Fanaticonan di Estrella a responde

ORANJESTAD, Aruba –November 2015: Despues di un bon preparacion e fanaticonan, famia y hungadonan di SV Estrella Digicel a reuni pa demostra forsa y union; hunto a cana pa yega asina na e fondonan necesario pa pone yerba artificial riba e tereno di e veld di bala na Papilon.

Digicel, patrocinador orguyoso di e ekipo por ta satisfecho di nan esfuerso pa reuni un masa di hende pa e prome “Orange 5K Fun Walk” cu sigur no ta bay ta e unico, ya cu e esunnan cu a participa a pidi pa sigui cu mas actividad no solamente pa recuada e fondonan necesario pero tambe pa por reuni hunto y repasa e importancia di salud, solaridad y amistad pa nan equipo.
Manera ta conoci, SV Estrella Digicel ta trahando duro pa sigui recauda fondo pa dicho organisacion deportivo por yega na realisa un veld completamente cubri cu yerba artificial cu lo contribui na adelanto di deporte pa nos hubentud.

Personal di Digicel a participa y a disfruta di e ambiente di solaridad cu a reina e diasabra aki.
Masha hopi ta esunnan cu a cumpra ticket pa contribui na e actividad. SV Estrella Digicel ta hopi contento y ta gradici tur esunnan cu a contribui, na cada miembro, comercio en general y tur esunnan cu a acudi, cu ta haci cu asina e soño por ta un realidad.

E caminata a bay den bon ambiente cu animacion di DJ Alvin. E prome persona cu a crusa e finish line ta e hungador talentoso M. Lopez. Digicel a regala algun cellular Samsung entre esunnan presente y di e forma aki a demostra su compromiso y colaboracion cu SV Estrella y comunidad en general.

Un gradicimento ta bay sigur na Digicel, Cerd NV, Mega Outlet, Valero Santa Cruz y Marriot Resorts & Stellaris Casino.