2 SIMAN FALTA PA CURA DOET
WILLEMSTAD— E aña aki un total di 236 proyekto a inskribí pa partisipá na CURA DOET 2017. Faltando apénas 2 siman pa e akshon nashonal di boluntario di mas grandi na Kòrsou tuma lugá ainda falta un total di 1000 boluntario pa kompletá un kantidat di boluntario nesesario pa e aña aki. Ku otro palabra CURA DOET ta sigui krese. E aña aki lo ta e di 4 edishon di CURA DOET i e akshon lo tuma lugá djabièrnè 10 i djasabra 11 di mart, e siman despues di Karnaval. Un yamada na hinter komunidat pa ban sostené nos organisashonnan sosial.
Banda di yuda un organisashon kumpli ku un meta di un organisashon, ku pa motibu di finansa no por realisá esaki promé, abo komo boluntario ta sali sumamente satisfecho ku bo a duna bèk na komunidat. CURA DOET ta urgí un i tur ku a yuda e 3 promé añanan pero no a registrá ainda òf pa promé biaha ke duna un man na desaroyo di e organisashonnan pa no warda te último momentu. Organisashonnan ta pendiente pa sa ken i kuantu hende ta bini pa nan prepará pa e dos dianan.
Registrashon ta masha fásil. Bishitá e website www.curadoet.com click riba partisipá komo boluntario i mira mesora tur proyekto ku a inskribí. Den e kaso aki tin 12 página yen di organisashon ku a inskribí ku por skohe den nan. Riba kada proyekto tin menshoná nòmber di e organisashon, deskripshon di e proyekto, ki dia i orario e proyekto ta tuma lugá i kuantu boluntario nan falta. Pa haña mas informashon di e tareanan planiá click riba Lesa Mas. Riba e siguiente página aki bo por traha un profil i Log In pa registrá komo boluntario. Te abou riba e página bo por buska tambe e sektor di bo preferensia. Bo por registrá komo individual, famia òf amigunan, komo empresa/organisashon/skol òf kualke grupo òf klup. Pues CURA DOET ta duna oportunidat pa komo grupo usa e dia aki tambe komo un sorto di teambuilding p’asina traha den union na un bon kousa.
Curaçao Cares i ‘Het Oranjefonds’ ta organisá CURA DOET i ta forma huntu ku BON DOET, ARUBA DOET, NLdoet, SXM DOET i STATIA DOET, e akshon boluntario di mas grandi di reino i Karibe. Komo bon siudadano nos tur por koperá pa un mihó komunidat. Sea ku ta na bienestar di mucha, hende grandi, personanan ku tin mester di èkstra atenshon, kuido di hende i animal òf un tarea riba e área di deporte, kultura, naturalesa etc. duna un man ta dunabo komo persona un sintimentu spesial. Entre nan mester tin un aktividat ku ta atraé bo. Forma bo grupo i registrá awor mes!
Pa mas informashon por email curadoet@curacaocares.org òf bishitá nos página di Facebook.