Pa un dokumental riba historia di sine di Kòrsou

E negoshi di sine a nase na Kòrsou aproksimadamente 1916 i for di e tempu ei nos isla a konosé diferente teater di sine. Pa por prepará un dokumental spesial, nos mester di potrèt i dokumentashon di tur nos teaternan di ántes, ku nos isla a konosé. Ta hopi teater a habri, sera, kima i habri bou di otro nòmber. Tin ku a pasa den tempu bon i tin otro ku a pasa den tempu ménos bon. Di tur e teaternan aki por tin hende ainda ku tin potrèt/dokumentashon wardá di e tempu ei, ku lo por yuda masha bon pa traha un dokumental spesial.

Ora papia di teaternan di sine na Kòrsou, nos ta referí na entre otro: Teater Naar – Salon Habana – El Ideal – Teater Brion – Teater Guillermina – Rialto – Teater Asiento – Cinelandia – Roxy – West End – Royal – Caribe – Rex –  Cine Rio – The Tempel – Airport Cinemas – Drive In (Groot Davelaar) – Golden Drive In – Teater na Sta. Rosa (di Ferris Daou) – Paradise Movies – i klaro awor aki The Movies – The Cinemas i Cinemark.

Separá di esaki, nos mundu di sine a konosé tambe Sine Trùk, Filmliga Curaçao, i nos ta’tin Komishon pa Kùr Sine, den kua diferente suidadano a partisipá. Ta’tin diferente hende ku a traha bendiendo karchi, tumando karchi, operadó di sine, bende kos dilanti nos teaternan i Dios sa den kua funshon mas relashoná ku nos teaternan di sine.

Nos ta pidi tur hende ku por tin potrèt, dokumentashon i ku ta dispuesto di pone esakinan disponibel pa e dokumental, pa nan por manda un email pa percy.pinedo@gmail.com òf yama Percy Pinedo na 5104946. Percy lo digitalisá e dokumento/potrètnan i entregá e original bèk na su doño mesora. Tambe e hendenan ku tin informashon oral, Percy ta dispuesto pa sinta i kòmbersá ku e personanan aki na un lugá, dia i orario ku nan skohe.