Willemstad- Minister di Enseñansa, Siensia, Kultura i Deporte (ESKD), sra. M. Alcalá-Wallé, resientemente a risibí di Nederlandse Taalunie e ‘Groene Boekje’ nobo. Prof. dr. Hans Bennis a keda nombrá komo sekretario general di e union pa idioma hulandes, Nederlandse Taalunie na febrüari 2017. Durante su promé bishita na e islanan hulandes-karibeño, prof. Bennis tabatin un enkuentro ku minisiter di ESKD, sra. Marilyn Alcalá-Wallé. Na e okashon ei Minister a risibí e último vershon di e ‘Groene Boekje’ di 2015. E lista di palabra den e buki akí tin komo ophetivo pa mas tantu posibel evitá inklaridat tokante ortografia ofisial di palabra hulandes. A amplia e lista di palabra ofisial di gobièrnu akí ku palabra manera chillen, appen, smoothie, lente-ui i dyscalculie. E buki akí ku ta sali kada dies aña, a keda publiká pa editorial Van Dale. Den e edishon anterior di 2005 a inkorporá un 400 palabra hulandes ku ta usa na Sürnam. E edishon di 2015 tin komo partikularidat, ku e ta kontené 419 palabra hulandes-antiano. Ta trata di palabra ku ta aparesé frekuentemente den e korantnan hulandes den Karibe hulandes manera: atrakoteam, achterporch, blenchi, fruitbarkje, maribomba, masbangu i megapier. Palabra manera ayaka i ayaca; chòler i choller a hinka na un forma dòbel den e buki komo ku nan ta aparesé frekuentemente tantu den e korantnan di Aruba komo esnan di Kòrsou i Boneiru.

Pa promé biaha den historia ku a publiká dos vershon di e ‘Groene Boekje’. Un edishon ku kaft duru i un otro edishon ku un vershon ku paperback mas ekonómiko, prinsipalmente pa alumno di skol i pa studiante. Kompletamente nobo ta e vershon online, ku ta disponibel gratuitamente i ku ta kontené mas palabra di entrada ku e buki mes.