TDS, nos kompania di televishon pagá, kier a partisipá na tur miembro, ku un mantenshon obligatorio lo tuma lugá di 24 di Aprel pa 02 di Mei próksimo.

Durante e mantenshon aki, TDS lo manda un señal pa tur bòks ku ta aktivo i p’e motibu aki  ta di sumo importansia pa klientenan tene bon kuenta ku lo siguiente:

TUR bòks mester keda sendé riba un kanal i no riba e ora. E televishon si, NO mester ta sendé, únikamente e bòks. Si e bòks no ta sendé durante di e periodo aki, lo e no siguí funshoná despues di dia 02 di mei próksimo.

Asina e bòks risibí e señal, e imágen lo bai for di aire entre 1 pa 2 ora p’asina e informashon ku ta den e señal por wòrdu inkorporá den e bòksnan. Despues di e tempu aki, e bòks lo sigui funshoná normal bèk.

Dor di e kantidat grandi di bòks ku tin, lo no por informá ku eksaktitut ki dia òf ki ora e bòks di kada kliente lo risibí e señal i p‘e motibu aki TDS ta informá e periodo ku esaki lo pasa, ku ta entre 24 di Aprel pa 02 di Mei binidero.

Di antemano TDS ta pidi su diskulpa pa kualke inkonbeniensia ku e mantenshon aki por trese kuné i alabes kier avisá tur kliente, ku si despues di 2 ora e bòks no kuminsá traha bèk, tuma kontakto inmediatamente ku 9242 pa mèldu esaki na HELPDESK. 9242 ta un number GRÁTIS pa tur kliente di CHIPPIE i telefòn fiho lokal di UTS.

TDS ta siguí perkurá pa informá su klientenan debidamente, p’asina brinda aun mas i mihó servisio.