“Pueblo di Kòrsou ya no por warda mas pa komienso di otro temporada di BAI E. I ora pueblo pidi, planta nashonal ta kumpli.” Ku e palabranan aki Gerente General di TeleCuraçao señor Hugo Lew Jen Tai ta anunsiá ku e gameshow elektrisante aki lo ta bèk riba pantaya dia 7 di mei próksimo. Despues di a regalá un kantidat di outo i alrededor di 100.000 florin na plaka kèsh, BAI E a bira sin duda e gameshow ku pueblo ta biba kun’é. BAI E ta gosa di un sintonia total bou di televidentenan i kada bes di nobo ta laga tur hende keda komentá.  TeleCuraçao i su partnernan tin ya kaba vários aña ta ofresé gameshow na su televidentenan i sin duda BAI E a dal hopi duru den komunidat. Pa e motibu aki gerensia a disidí pa hasi un edishon mas. No solamente e sintonia haltu i e premionan aktraktivo ta hasi e programa eksitoso, pero tambe e gran sosten di e partnernan i kasnan komersial di TeleCuraçao ku tur aña di nobo ta para tras di e gameshow. E aña aki, BAI E ta konta ku 9 kompania kaminda klientenan por kumpra pa haña e chèns pa partisipá den BAI E. E kompanianan partisipante e aña aki ta: UTS, MCB, Hucor Holding (Kentucky, Pizza Hut i Subway), Licores Maduro, Better Deals, KIA, Landsloterij, ENNIA i InterAlfa. Partisipashon i Chèns di GanaMeskos ku tabata e kaso e temporada pasá, kada kas komersial òf partner por hiba nan propio kampaña manera nan ta deseá (pues no nesesariamente mester ta kampaña di lòt). Na final di luna kada partner ta saka 2 representante, pa un total di 18 partisipante ku lo bai purba nan suerte uzando algu di strategia pa gana sea un outo Kia òf un Nissan òf plaka kèsh. Bai e dòbel- Mas chèns pa ganaCaresse Balentien-Hooi i Aubrey Janga lo fungi un bes mas komo e animadónan di e gameshow. Pero e aña aki pa oumentá e suspenso aun mas tantu lo introdusí algun kambio den e wega. Manera ya ta konosí tur partisipante lo tin chèns di bai kas ku plaka kèsh, ya ku for di inisio di e wega, promé ku e partisipantenan haña chèns pa skohe un yabi for di e tómbola, lo ofresé nan un montante di plaka. E kambionan aki sin duda lo oumentá e tenshon i emoshon den e wega i ta duna e partisipantenan aun mas chèns pa gana. Ki dia BAI E ta kuminsáE kampaña ta wordu lansá 27 di Mart 2013, 9.30 pm na TeleCuraçao kanal 8 pa medio di un programa kaminda lo bai rekordá momentunan emoshonante di aña pasá i introdusí e partnernan di e grandioso gameshow aki. Despues di esaki, tur e kasnan komersial i kompanianan partisipante lo kuminsá nan kampaña individual for di kua lo asigná dos representante pa partisipá den e promé edishon di BAI E, ku lo tuma lugá 7 di Mei 2013. BAI E lo keda presentá un bes pa luna riba tur promé djamars di luna den e studio prinsipal di TeleCuraçao. Durante di 9 luna largu partisipantenan lo tin chèns di ta e felis ganadó di sea un outo òf por tuma plaka kèsh. Na Yanüari 2013 lo saka e último ganadó di e gameshow. Televidentenan lo por sigui BAI E tur promé djamars di luna pa 9:30 pm, djis despues di sorteo di Wega di Number Kòrsou. “Mirando e akohida grandi di BAI E den e temporadanan anterior, no tin duda ku e temporada aki atrobe nos gameshow BAI E lo gosa di sintonia total bou di nos televidentenan. Mi ke yama un danki na komunidat ku ta sostené nos planta nashonal tur dia i tambe nos partnernan i kasnan komersial ku ta hasi posibel ku nos por brinda un gameshow asina eksitante na e públiko. Pueblo sigur lo mester keda pendiente pa sa ken lo BAI E of keda sin BAI E.” señor Hugo Lew Jen Tai a finalisá bisando.