Projekto Piloto “Terapia basá riba Ehersisio Intensivo” a ser akabá

Siman pasá e projekto piloto di Fundashon Alton Paas titulá “Terapia basá riba Ehersisio Intensivo“ a ser akabá.  E projekto piloto, na kual 6 persona lokal ku ta sufri di ‘SCI’ (e abreviashon pa paraplegia, esta ‘dwarslesie’) a partisipá, a dura seis luna i tabata un eksperimento pa averiguá si tin maneranan mas lihe i efektivo pa aselerá e proseso di rehabilitashon di pashèntnan ku SCI (paraplegia). “Den nan abilidatnan físiko e pashèntnan ta mustra progresonan positivo, nan konfiansa propio a krese i nan ta hasta mas motivá pa sigui traha pa por rekuperá aun mas!” ta e promé konklushonnan tentativo ku según terapista di Brucker Biofeedback Matthias Krieger, por saka di e proyekto.

E proyekto a konsistí di tres fase: un skèn na komienso di e proyekto i  treining dirigí pa medio di e sesionnan intensivo di terapia Brucker Biofeedback, siguí pa fisioterapia i guia sikológiko i por último komo fase final atrobe un skèn i treining según e método Brucker Biofeedback.

E Método Brucker Biofeedback (BBFM) pa medio di aparatonan visual i ouditivo ta duna un indikashon riba un pantaya di e prosesonan fisiológiko ku nos sistema nervioso sentral ta aktivá denter di nos kurpa. Pa algun tempu kaba na Estado Unidos i Alemania un téknika edukativo ta ser apliká di tal forma ku ta hasi posibel pa trein sèlnan di nervio (neurona) funshonal pa traha konekshonnan nobo ku muskulonan disfunshonal pa di e manera aki mehorá of rekobrá e funshon di e muskulonan. Ta trata di un téknika ku ta midi e señalnan entre e selebre i e kurpa di un persona (eksaminashon elektromyogram). Si akaso e señalnan ta muchu suak, e pashènt no por aktivá e muskulonan korespondiente na un manera selektivo. Ku yudansa di elektrodonan i un programa di kompiuter spesialmente desaroyá pa e motibu aki, e pashènt por mira i tende e moveshonnan muskular. Pa medio di un treining supervisá konekshonnan di nervio nobo ta seru kreá kondusiendo na señalnan mas fuerte pa e muskulonan intenshoná. Esaki ta yuda e pashènt optimalisá i fortalesé su moveshonnan físiko, sosteniendo e funshonnan ku ta esensial pa bida di un hende. For di su lantamentu na aña 2009 BBFM Centrum Curacao ta situá na Dolphin Suites Hotel i tambe ta forma parti di e terapia di Dolfein di Curacao Dolphin Therapy & Research Center (CDTC).