WILLEMSTAD- 26 di febrüari 2016– Resientemente a tuma lugá e terser ‘Curaçao InfoMart’ na Paramaribo, Sürnam den lòbi di hotèl Krasnapolsky. E bishita na Sürnam e aña aki tabata mas intensivo pa motibu ku tabata pa promé biaha ku a organisá e marshe di informashon tambe na Nickerie, nortwèst di kosta di Sürnam. Meskos ku añanan anterior CTB huntu ku diferente partner den sektor privá a duna informashon di Kòrsou na e bishitantenan di e marshe.
Ku un brel tri-dimenshonal (3D) e bishitantenan di e marshe por a pasa den un eksperensiá virtual kaminda nan a sinti manera ta na un playa na Kòrsou nan ta òf ku nan ta kanando den nos sentro di siudat Willemstad. Damanan bistí den trahe di karnaval i trahe di folklor ku diseño di e kampaña di ‘Dushi Hende’, a duna un bista di Kòrsou yen di ambiente. Miéntras ku parti paden tur hende tabata risibiendo informashon, parti pafó tabatin músika di brasbènt i durante henter dia e públiko por a disfrutá di músika di Kòrsou i Sürnam presentá dor di grupo ‘Friends’. E delegashon di Kòrsou a konsistí di: Livingstone Jan Thiel Resort Curaçao, Papagayo Beach Hotel, MustiQue Suites Curaçao, Renaissance Curaçao Resort & Casino, Sunscape Curaçao Resort Spa & Casino, Holiday Beach Hotel and Venetto Casino i Fiesta Tours. Huntu ku e delegashon di Kòrsou, tambe tabatin presensia di InselAir, Surinam Airways, Waldo’s Travel, VKV Travel, Rasonic Travel i Mets Reisburo ku kualnan a duna informashon di kompra di pasashi i paketenan di ‘tour’. Ámbos aeroliña, e hotèlnan presente i Rasonic Travel i Waldo’s Travel a rifa diferente premio, entre nan pasashi ida i buèlta pa 2 persona pa Kòrsou inkluyendo estadia.
Na Nickerie kaminda a tene e marshe pa promé biaha tambe públiko por a eksperensiá un tiki di Kòrsou ku diferente show i damanan bisti den trahenan típiko di Kòrsou. Tabata pa promé biaha ku un evento manera InfoMart a tuma lugá na Nickerie; esei mes a hasi ku e interes tabata grandísimo. E bishitantenan a hasi hopi pregunta na e tim di Kòrsou. CTB ta sigui ku e esfuersonan pa promové Kòrsou komo un destinashon úniko den Karibe.