Pa di 4 bia El Tributo en kolaborashon ku pianista, kompositor i areglista Randal Corsen ta bai organisá un evento musikal tur afó.

Thnxgiving Concert ta un konsepto nobo kaminda nos ta bai yama danki p’e bon den nos bida, selebrá nos herensia musikal i yama danki na tur esnan ku a bai nos dilanti lagando tesoronan kultural atras. Corsen komo direktor musikal i su orkesta di musikónan di taya lo toka piesanan varía for di diferente género di Tambú, Jazz, Tumba i Seú. Musika ku ta ankrá den nos herensia kultural.

E mainta yená di gratitut aki lo no ta kompletu sin aktuashon estelar di Kris Berry, Jean-Jacques Rojer, Dibo Doran i doña Mafalda Minguel. Kada un di e solistanan i direktor musikal tin un laso familiar impreshonante ku nos patrimonio musikal i literatura, di kual publiko lo por bai disfruta di dje durante e presentashon.

Thnxgiving Concert lo tuma lugá djadumingu 26 di novèmber proksimo, for di 10or di mainta te ku 12or di mèrdia na Morada Santa Bottelier. Entrada lo ta kompletamente gratis.