Industria di IT/ICT ta kresiendo rápidamente na Kòrsou

WILLEMSTAD:- Dia di ‘Hende Muhé den ICT’ a keda selebrá pa promé bes na 2011, for di e aña ei mas di 177,000 hende muhé a partisipá aktivamente na e selebrashon aki. E ‘Girls in ICT Day’ ta skematisá tur aña riba e di kuater djaweps den luna di Aprel, e aña aki e ta awe riba dia 28 di Aprel. Mas ku un selebrashon e ta un dia pa konsientisá e hende muhé riba nan posibilidatnan den industria di IT/ICT.

E desaroyonan di ICT den merkado di Kòrsou ta remarkabel i ta demostrá kresementu kontinuo pa Digicel. Esaki partikularmente ta nifiká ku Digicel ta muchu mas ku un proveedor di telekomunikashon; awor ta ofresé solushonnan den efisiensia pa tur nesesidat riba tereno di ICT tambe. “Nos a demostrá mas ku 50% di kresementu den e último 24 lunanan. Kontinuamente nos ta introdusí produktonan i servisionan nobo ku ta pèrmití nos sigui krese den merkado. Nos personal den departamentu di ICT tambe a krese ku 50% den transkurso di e añanan, sinembargo ta únikamente 12% ta hende muhé”, esaki di akuerdo ku Des Wynne, direktor di Digicel Business Sales pa Kòrsou i Boneiru.

Des Wynne ta sigui splika,”For di e total di e empresa, únikamente 40% ta hende muhé. E situashon ideal lo ta un average  di 50% igual entre personal femenino i maskulino- ta e meta pa e ta asin’ei tambe. Nos ta komprometí pa oumentá e kantidat di hende muhé laborando den nos departamentu di ICT ku 13%, den e próksimo 12 lunanan- hasiendo esaki 25% i den e próksimo 24 lunanan nos lo mester yega 35%”.  Charlene Caines, Hefe di Personal pa Digicel Kòrsou i Boneiru ta enkurashá damanan pa skohe un karera den IT/ICT i hasi tur training nesesario pa nan alkansá un nivel haltu den e profeshon. “E industria di IT/ICT na Kòrsou ta kresiendo rápidamente; nos ta sostené e dama ‘young professional’ ora nan kuminsá un karera den IT/ICT. E meta di Digicel ta pa enkurashá e hende muhé pa tuma ròlnan aktivo den desaroyo di ekonomia global i pa tuma desishonnan importante ku por tin un impakto direkto den desaroyo di kualke empresa.”