Refineria Isla a nota ku un rapòrt trahá dor di e kompania E&D Technologies a wòrdu publiká i ta kousando preokupashon den nos komunidat. No ta intenshon di Isla pa reakshoná riba e kontenido di e informe aki a traves di medionan di komunikashon. Sin embargo, pa motibu di e preokupashonnan ku e publikashonnan tokante e informe aki por a trese na nos komunidat, nos ke informá lo siguiente:

E kompania E&D Technologies a petishon di RDK a hasi un “audit” na refineria. Refineria Isla a haña e rapòrt preliminar aki pa por duna su reakshon. Na e momentunan aki, Refineria Isla ta pasando dor di e informe pa pone su komentarionan i manda su reakshon por eskrito pa RDK.

Refineria Isla Curaçao BV, durante e transkurso di 32 aña di operashon, tin un rekòr di operashon konfiabel kual no ta posibel sin un mantenshon debidamente planifiká i ehekutá. Den e último 10 añanan Refineria Isla a gasta 2.3 mil mion florin na mantenshon di e fasilidatnan ku e ta hür. Esaki ta un averahe di 230 mion florin pa aña.

Nos departamento di “Parada di Planta” tin hopi bon definí na kua momentu kada planta mester keda pará pa revishon. Esaki kumpliendo ku e normanan internashonal di mantenshon di planta i fortifiká ku e eksperensia di nos ekipo tékniko, nos ekipo di inspekshon i nos ekipo di operashon. Te ku awor Isla a kumpli kabalmente ku su plan di mantenshon. Ta importante resaltá ku aki nos ta referí tantu na e mantenshon rutinario, e mantenshon programá, proyektonan di mehoramentu (upgrading) i mantenshon ekstraordinario. E interpretashon ku refineria Isla no ta kumpliendo ku su responsabilidat di mantené e refineria, no ta korekto. Ku otro palabra, Refineria Isla debidamente ta kumpli ku mantenshon di su instalashonnan.

A la bes Refineria Isla ke informá ku pa loke ta trata futuro di refineria, konforme loke a wòrdu palabra den e último enkuentro entre representantenan di Venezuela i Gobièrnu di Kòrsou a tene e promé reunion ku e tim tékniko siman pasá 23 di novèmber 2017. E reunion aki tabata entre representantenan di PDVSA, Refineria Isla, RDK i MDPT.