Licores Maduro ta invitabo kumpra bo karchi den preis di promoshon e wikènt aki

WILLEMSTAD/ NOVEMBER: E kabayeronan di kansion, amigunan di esenario i berdadero galánnan di tur tempu, lo para huntu riba esenario pa presentá un show tur afó. Tres konsierto den un; Tony Sherman, Leslie Vos i Boy Thode lo kanta tur nan éksitonan riba un solo anochi kompañá pa un All Starband bou direkshon di maestro Gregory Colina. Djasabra dia 20 di desèmber próksimo e sala di ekshibishon di WTC lo vibra di amor, ku un toke navideño pa kaba di aksentuá e temporada festivo di fin di aña. Den antesala di e show, Amos Balentin, Randy Leroy i Clifton End lo kanta den antisipashon di e konsierto “Gentlemen Christmas Dinner Show”. Pa e show dia 20 di desèmber benidero lo tin 2 sekshon; esun general stipulá na 65 florin i esun ku ta inkluí e sena (bufèt) di Pasku na 150 florin- por kumpra e mesa kompletu di 6 persona, òf por kumpra karchi los na puntonan di benta i tuma asiento pa disfrutá di e sena fenomenal ku a keda prepará dor di The Trader.  E bufèt lo konsistí di delisianan navideño, un variashon amplio di kuminda entre otro e tradishonal ham di Pasku, salada di bakiou/ galiña sukulento, tambe por saboriá di beef tenderloin, Ayaka na fòrnu i muchu mas sirbí den ‘dinner size dishes’.- e bufèt ta inkluí 2 bebida. Bufèt lo wòrdu sirbí entre 20:00 i 21:30, pa despues show kuminsá. Durante di sena, lo presentá e antesala ku Amos Balentin, Randy Leroy i Clifton End.  E konsierto di Tony Sherman, Leslie Vos i Boy Thode lo kuminsá 21:30 en punto! Tres konsierto den un, kada kantante lo risibí 45 minüt di show individual pa despues kulminá e anochi ku 30 minüt di show huntu. Di akuerdo ku e organisashon, ta laga e aparishon i orario di kada artista komo un sorpresa. Miéntras ku ya kaba tin hopi espektativa, ta e fin di siman aki e karchinan lo wòrdu pone na benta na e diferente puntonan, Mensings Caminada, Tik Tak i Beep Beep na Rio Canario- pa reservashon di mesa por yama 513.2137 òf 690.7272.  Licores Maduro komo un di e patrosinadònan di e “Gentlemen Christmas Dinner Show” lo bende un kantidat di karchi general limitá na NAf 50,00 na su booth durante di e fin di siman aki na Christmas Showcase & Fashion Weekend.  Tur punto di benta lo tin karchi di tantu general komo e bufèt, pero únikamente na e booth di Licores Maduro durante di Christmas Showcase & Fashion Weekend lo tin e preis di promoshon, esta NAf 50,00 pa entrada general.