Den preparashon pa e gran konsierto na WTC dia 20 di desèmber próksimo

WILLEMSTAD/ DESEMBER: Ayera den oranan di mainta ku mèrdia nan a demostrá ku nan ta kabayero di bèrdat. Tur tres kabayero di kansion a bishitá kasnan di grandi i topa ku fanátiko. Miéntras a kuminsá un rekorido na medionan di komunikashon ku bishita na entre otro programa di televishon Moru Bondia. Tambe a hasi un bishita na e programa navideño na CBA. E siman aki lo sigui ku un seri di entrevista, djarason na Mas 99 durante Fèfè Farandulero, djaweps nan lo ta den programa Paparazzi na emisora Direct 107, sigui pa algun otro enkuentro mas ku fanátiko. Di akuerdo ku organisashon, e kabayeronan ta klá pa ofresé Kòrsou un show tur afó. Ensayonan ta kanando a mil maravia. “Gentlemen Christmas Dinner Show” mester ta aksesibel pa tur hende, ta trata di 3 kabayero stimá pa e komunidat aki, esei mes a hasi ku tin koperashon ku ACU, Fundashon Nos Grandinan, Fundashon Duna un Chèns i muchu mas. Miembronan di ACU ta disfrutá di preis preferensial optenibel únikamente na Beep Beep RIO Canario- karchi general limitá na NAf 45,00 i Dinner (mesa) pa Naf 130,00. Pa atkisishon di karchi regular general NAf 65,00 i Dinner (mesa) pa Naf 150,00, tin na tur punto di benta- tantu general komo e bufèt. Ta rekordá riba e diferente puntonan di benta, Mensings Caminada, Tik Tak i Beep Beep na Rio Canario- pa reservashon di mesa òf karchinan na kantidat grandi  por yama 513.2137 òf 690.7272. E kabayeronan di kansion, amigunan di esenario i berdadero galánnan di tur tempu, lo para huntu riba esenario pa presentá un show tur afó. Tres konsierto den un; Tony Sherman, Leslie Vos i Boy Thode lo kanta tur nan éksitonan riba un solo anochi kompañá pa un All Starband bou direkshon di maestro Gregory Colina. Djasabra dia 20 di desèmber próksimo na WTC. Den antesala di e show, Amos Balentin, Randy Leroy i Clifton End lo kanta den antisipashon di e konsierto “Gentlemen Christmas Dinner Show”.