Willemstad – E 5 finalista nan ku e aña aki a sali den tòp 5 di Kantadó Mayó a uni forsa i ta lansa e kansion ‘Bo Bandera’ pa honra nos bandera i alsa nos patriotismo. Inisiativa pa traha e kansion aki a bin di e hóbennan mes i ku sosten di Fundashon Seú Kòrsou nan a traha duru pa logra nan meta. E kansion ta di e ritmo seú skibi pa Marvin ‘Pikachu’ Snijders. E hóbennan tòp 5 di Kantadó Mayó ku a bin ku e inisiativa i ta interpretá ‘Bo Bandera’ ta Furgell Wijngaarde, Rashid Felida, Germain Genaro, Angelo Libinia i Tito Doran. A skohe pa lansa e kansion aki pa Dia di Bandera pero meta di e kansion ta pa e zona na tur e radionan lokal durante di henter aña. Korsou mester di un empuhe positivo. E sinku hóbennan aki tambe ta kontribuí na e ola di positivismo di ta Bon Yu di Kòrsou i ku hopi entusiasmo ta dediká ‘Bo Bandera’ na Kòrsou. Un danki spesial ta bai na Hershel Rosario ku a pone su mes i su studio di grabashon na disposishon. Señor Hershel Rosario a kere for di inisio den e proyekto i e hóbennan. No por a logra e meta aki sin su balioso kontribushon. Danki tambe na tur ku a yuda pa e kansion ‘Bo Bandera’ bira un realidat. ‘Bo Bandera’ ta un regalo pa Kòrsou. Kòrsou tin hóben positivo riba dje; Ban uni forsa i demostrá ku nos ta Bon Yu di Kòrsou. Hisa Bo Bandera, Waya Bo Bandera! Pa mas informashon di e proyekto i pa booking por tuma kontakto ku señor Felip Guanipa na 517 0039.