WILLEMSTAD – Manera ya a ta konosí resien, lo bai instalá lusnan di e sistema LED na Sentro Deportivo Kòrsou. E instalashon di lus aki ta un inovativo i mas ku tur kos ta yuda spar riba gastu di energia. Minister Gijsbertha a perkurá pa a aloká fondo pa realisá e instalashon nobo di lus. E kompnia enkargá ku e trabounan ta Industech.

Awe djamars 21 di mart ta dia ku ta duna inisio na e trabounan konserní. Ta kuminsá awe ku e promé parti kua ta enserá kambio di e fusenan. Esaki ta nifiká ku den e fase aki, lo no tin koriente den Stadion. Konsekuentemente lo no tin iluminashon den oranan di anochi den e area menshoná. E fase aki lo dura te ku dia 24 di mart.

Dia 25 lo kuminsá ku kambio di e lusnan mes. Pa esaki lo hasi uso di 2 kran grandi i pa motibunan di seguridat pa un i tur, no ta permití niun hende den área di stadion for di 8or di mainta te ku 5or di atardi. Si tur kos kana segun plan, e trabounan lo finalisá otro siman djarason 29 di mart.

FDDK ta pidi su diskulpa pa kualke inkumbinensia ku esaki por trese kuné i ta gradisí pa e koperashon, pa huntu nos hiba SDK na e akomodashon ku iluminashon moderno ku nos tur ta deseá.