WILLEMSTAD- Djamars dia 20 di Sèptèmber trabounan na Marie Pampoen Wèst a start ofisialmente pa medio di un ‘groundbreaking’. E trabounan aki ta forma parti di e masterplan pa desaroyo di Marie Pampoen.

E projekto pa desaroyo di Marie Pampoen ta un inisiativa di Ministerio di Desaroyo Ekonómiko huntu ku Ministerio di Tráfiko, Transporte i Planifikashon Urbáno i Ministerio di Salubridat Públiko, Medio Ambiente i Naturalesa. E projekto ta enserá ku e area di Marie Pampoen kuminsando for di e pir te na e kancha di deporte lo wòrdu desaroyá den un lugá di rekreashon tantu pa e habitante di Marie Pampoen komo pa e bishitante.

Kordinashon di e projekto ta den man di Curacao Tourism Board (CTB). I Heren2 Caribbean B.V. ta e kompanía enkargá ku implementashon di e Masterplan pa desaroyo di Marie Pampoen.

E trabounan a kuminsa na e parti wèst; serka banda di e kancha di deporte. Ta e intenshon ku e trabounan aki na Marie Pampoen Wèst lo terminá pa Desèmber di e aña aki. Si tur kos transkurí segun plan e trabounan di desaroyo di Marie Pampoen lo ta kla den nan totalidat pa fin di aña 2017.

Dia 6 di Sèptèmber último a organisá un seshon di informashon pa e habitantenan di Marie Pampoen tokante e kontenido di e Masterplan i kualke molester ku esaki lo por trese kuné. E tres ministerionan envolví den e plan aki huntu ku CTB i Heren2 Caribbean BV ta diskulpá pa kualke inkumbiniensia ku e trabounan aki lo por trese kuné pa habitantenan di Marie Pampoen i besindario. Depaso nos ta gradisí pa e komprenshon i pasenshi mientras Marie Pampoen ta wòrdu kombertí den un lugá di rekreashon plasentero pa nos tur.