Training di Randal Corsen i Orkesta huntu ku Mr. Saab pa “Bin, Bula’den” di Lions Club


Kos ta serio…

Willemstad – Tur kos ta kanando según plan pa “Bin, Bula’den” di Lions Club. E fiesta di karnaval ta tuma lugá djasabra awor dia 3 di febrüari na Fort Nassau. A kumisa ku e parti di set up kaba i mester bisa ku nos a bai tira un bista na e training di Randal Corsen i su orquesta i… nan ta preparando un show ekstraordinario pa djasabra awor. E ambiente ta kuminsa for di 9 or di anochi ku presentashon di DJ Boogieman i ERA, e reinan di ambiente.

Kantantenan ku ta bai tembla Fort Nassau huntu ku Randal Corsen i su orkesta ta Dibo D, Rich Pieter, Yumarya Grijt i highlight di e anochi ta Sidney ‘Mr. Saab’ Isidora. Nos Rei di Tumba  Urvin ‘Luwi’ Yano tambe lo ta sende sende na e fiesta di Lions. E fiesta di karnaval ta kosta NAf 250,- i ta inklui kuminda i bibida ilimita. Manera ta e kaso ku añanan anterior bon ambiente ta garantisá. Bar i kushina ta bon surti i ta na enkargo di The Trader. Karchinan ta obtenibel na Mensing’s Caminada i serka miembronan di Lions Club. Sosionan di ACU por kumpra nan karchi na e preis redusi di NAf 225,- na The Trader na WTC. Tur fondo rekoudá ku e fiesta di karnaval aki ta bai pa e club por kontinuá ku e diferente trabounan karitativo ku e ta hasiendo.

Ta hasi un petishon na tur bisitante di fiesta pa sigui instrukshon di e miembronan di seguridat pa garantisá ku tur kos ta kana bon. Por parkeer na Deloitte, dilanti UTS, TeleCuraçao, Birgen di Arrarat i Ennia. Lo tin transporte di bus for di tur e diferente puntonan aki pa Fort Nassau. Pa mas informashon bishitá e Facebook page di Curaçao Lions Club. Por yama tambe na      529 99 06 òf 560 22 91.