WILLEMSTAD – Dia 23 September a tuma lugá e traspaso na notario di e propiedatnan di Rif Resort Hotel NV (Rif Resort), ku ta konosí komo Curaçao Marriott Beach Hotel & Emerald Casino, pa e doño nobo Grupo Orco. Awor e doño nobo por bai ehekutá e plan pa un renovashon i ekspanshon grandi pa e hotèl resultá na un nivel mas haltu ku por duna un empuhe importante na e sektor hotelero di Kòrsou.

Na ougùstùs último a yega na un akuerdo ku Grupo Orco pa bende e propiedat. Benta di hotèl a generá alrededor di 25 mion florin. Importante ta ku e doño a kumbiní pa invertí adishonalmente 60 mion florin pa renová e hotèl aki pa e kumpli ku e normanan moderno di Marriott. Banda di e renovashon aki e doño nobo lo ekspandé e hotèl ku un piso mas riba e edifisio i asina e kantidat di kamber por krese te alrededor di 344 unidat. E karakter drástiko di e plannan aki a pone ku no ta posibel pa tene e hotèl habrí durante e proseso di renovashon i ekspanshon. Grupo Orco a kumbiní kaba ku Marriott International pa e hotèl keda karga e nòmber di Marriott despues di e renovashon ku lo dura alrededor di un aña i mei.

Empleadonan

A atendé ku kada un di e empleadonan pa un areglo di terminashon di trabou, konforme un plan ku a prepará di antemano. A trata tur empleado igualmente i a base di e areglo laboral ku nan tabatin ku e hotèl i lo kompensá nan konforme e palabrashon. Tur e pagonan mará na esaki mientrastantu a tuma lugá. Ademas, a organisá merkadonan di empleo ku CHATA i e ministerio SOAW pa wak ken di e empleadonan nan por yuda ku otro trabou den e sektor di turismo òf otro sektornan di Kòrsou.

Akto notarial

Despues di a kaba di atendé e último partinan di e papeleo ku ta asosiá na kualke proseso di benta di e índole aki, awor tur kos tabata kla pa kulminá den e traspaso ofisial di Rif Resort pa Piscamar Beach Resort, parti di Grupo Orco. Na notario Henri Burgers e traspaso aki a tuma lugá formalmente den un akto ofisial ku tur e dokumentonan mará na esaki.