Willemstad – E entidat US TSA a enkargá tur kompania di aviashon ku tin buelonan pa Merka komo destinashon, pa implementá  medidanan di seguridat adishonal riba biahero ku ta biaha for di tur destinashon pa Merka. Biahero ku tin komo destinashon Merka, mester tene kuenta ku kontròl adishonal di nan artikulonan elektroniko personal (Personal Electronic Devices / PED’s), debí na e medidanan nobo.

E entidat US Transportation Security Administration (US TSA) ta un departamentu den ‘U.S. Department of Homeland Security’, kual ta e outoridat pa loke ta trata seguridat di e públiko biahero na i pa Merka. Resientemente e departamentu a stipulá ku ta nesesario pa oumentá e medidanan di seguridat pa tur buelo komersial pa tur destinashon na Merka. Tambe na Curaçao International Airport a implementá e medidanan aki.

Curaçao Airport Partners NV (CAP), en kolabrashon ku  Curaçao Civil Aviation Authority (CCAA) i e kompanianan di aviashon a realisá e akshonan nesesario pa asina kumpli ku e rekesitonan nobo. Ta konsehá biaheronan ku destinahon pa Merka pa check-in tres ora adelantá. Personan ku ta biaha pa Merka ku tin preokupashon tokante transportashon di artikulonan elektroniko personal por tuma kontakto ku e aeroliña ku nan lo biaha ku ne pa mas detaye.