WILLEMSTAD- 28 di yanüari 2014 – Hasiendo uso di e modelo ‘Turistika’, e departamentu di investigashon di CTB huntu ku MEO a kalkulá ku pa 2013 sektor di turismo a generá 730.5 mion florin. Na 2012 e entrada generá for turismo tabata 685.6 mion florin. Turistanan Europeo a gasta un total di 317.8 mion florin ku ta igual na 43% di e total generá pa e sektor di turismo pa 2013. Sigui pa turistanan for di e region di Sur Amérika ku a gasta un total di 207.3 mion florin miéntras turistanan for di Nort Amérika a gasta un total di 135.2 mion florin durante nan estadia na nos isla. For di e region di Karibe e total generá tabata 46.6 mion florin den 2013. Pa loke ta trata e kantidat di turista di estadia pa 2013, sifranan kolektá pa Ofisina di Turismo di Kòrsou (CTB) ta indiká ku un total di 440,714 turista di estadia a bishita nos isla. Esaki ta un subida di 5% kompará ku aña 2012. Na 2012 e kantidat di turista di estadia tabata 420,868. For di e region di Europa nos a risibí na 2013 un kantidat di 175,607 bishitante kompará ku un kantidat di 175,161 na 2012. E region di Sur Amérika a konosé un subida di 10% kompará ku 2012. Na 2013 a registrá un total di 135,773 turista di estadia kompará ku 123,490 na 2012. Pa loke ta trata e region di Nort Amérika nos a risibí 71,228 turista, ku ta un bahada leve di 1% kompará ku 2012. Miéntras ku e region di Karibe a konosé un bahada di 3% durante 2013. Total nos a risibí 38,936 turista di estadia for di e region aki. E 5 merkadonan prinsipal pa Kòrsou pa loke ta trata aña 2013 tabata; Hulanda ku 131,995 (30,0%), Venezuela ku 92,256 (20,9%) turista, Merka ku 61,627 (14,0%), Aruba ku 20,041 (4,5%) turista i Alemania ku un total di 17,604 (4,0%). E kantidat di anochi ku e turista a keda riba nos isla durante 2013 kompará ku 2012 a konosé un subida di 2%. Un total di 3,750,631 anochi a keda registrá durante 2013. E region di Nort Amérika a konosé un bahada di 4%, Karibe un bahada di 3% i e region di Europa 2%. Miéntras e region di Sur Amérika si a konosé un kresementu di 8%. Durante 2013, 33% di e bishitantenan a skohe pa keda na un adrès privá. 32 % a keda na un hotèl grandi (hotèl ku mas di 150 kamber). Un kantidat di 14% a skohe pa un bùngalo, un kantidat similar esta 14% a keda na hotèlnan chikí, pues hotèlnan ku ménos ku 150 kamber i 5% a skohe pa keda na un apartamentu registrá.