Tur merkado prinsipal a registrá sifranan positivo na novèmber 2017
WILLEMSTAD – 21 di desèmber 2017 – Ofisina di Turismo di Kòrsou (CTB) ta raportá kresementu for di tur merkado prinsipal. Hulanda, Estádos Unídos, Canada, Brazil i Colombia tur tabatin un prestashon positivo na novèmber 2017. No opstante e prestashon positivo di e merkadonan prinsipal, novèmber a sera ku un bahada di 2%. Un total di 664 turista ménos a keda registrá na novèmber 2017 hibando e total na turista di estadia na un total di 33.723 kompará ku 34.387 na e mesun luna aña pasá. E bahada den kantidat di turista di estadia ta basá riba e echo ku e kantidat di turista for di Venezuela i Alemania ta afektando e sifranan total di yegada. Un bahada di 19% a keda registrá for di Venezuela na luna di novèmber. Miéntras ku for di Alemania un bahada di 29% a keda registrá na novèmber. Den sifranan apsoluto ta trata aki di un kaida di respektivamente 561 i 701 turista ménos for di Venezuela i Alemania.
For di region di Nort Amérika nos ta bolbe mira un kresementu di sifra dòbel di 16% na luna di novèmber 2017. Total region di Nort Amérika a registrá 6.610 turista di estadia. Nort Amérika ta representá 16% di tur e turistanan ku a bishitá Kòrsou na luna di novèmber e aña aki. Un kantidat di 5.374 turista di estadia a keda risibí for di Estádos Unídos na novèmber, registrando 16% kresementu kompará ku aña pasá. Un análisis profundo den e prestashon di Estádos Unídos ta ilustrá ku e tráfiko aéreo for di airport di Miami a krese ku 14% na luna di novèmber miéntras ku for di airport di New York un kresementu di 30% a keda registrá. Canada tambe a krese ku sifra dòbel, registrando 19% na novèmber 2017. Kòrsou a risibí un total di 1.236 kanades na novèmber. Novèmber ta tambe e komienso di e e temporada haltu for di Canada.
For di Europa a registrá un bahada leve di 1% na novèmber ku un total di 17.432 europeo ku a bishitá Kòrsou. Aña pasá Kòrsou a risibí un total di 17.687 turista for di Europa. Europa ta representá 52% di tur e turistanan ku a bishitá Kòrsou na luna di novèmber. Hulanda a registrá un kresementu leve di 2% na novèmber 2017. Den sifranan apsoluto esaki ta 218 turista hulandes mas. Alemania a konosé un bahada di 29% na novèmber 2017. Un total di 1.680 turista aleman a bishitá nos pais na novèmber 2017. E pèrdida di konekshon aéreo for di Dusseldorf ta afektando e kantidat potensial di bishitante prosedente di Alemania.
Ménos kantidat di turista a keda risibí for di region di Sur Amérika, un total di 6.115 turista di estadia a keda registrá. E kaida aki ta debí na e bahada kontinuo den kantidat di turista di estadia for di Venezuela. Na luna di novèmber Kòrsou a risibí 2.331 turista prosedente di Venezuela kual ta 19% ménos kompará ku aña pasá. Brazil i Colombia a presta bon kompará ku aña pasá. For di Brazil un total di 813 turista di estadia a keda registrá kual ta un oumento di 13%. For di Colombia e kresementu tabata di 24% na novèmber 2017. Den sifranan apsoluto e kantidat registrá tabata 1.484.
No opstante e echo ku novèmber a registrá ménos turista di estadia tòg por mira un oumento leve di 1% pa loke ta trata kantidat di anochi ku e bishitante a keda riba nos pais. Un total di 280.314 anochi a keda registrá kompará ku 278.530 na aña pasá. Region di Nort Amérika a registrá 21% mas kantidat di anochi di estadia. Tantu Estádos Unídos komo Canada a registrá sifranan positivo; respektivamente 19% i 30% mas anochi. Turistanan for di Nort Amérika a keda 42.667 anochi na novèmber 2017. For di Europa un bahada leve di 3% a keda registrá miéntras for di Hulanda un bahada di 1% a keda registrá. Total turistanan hulandes a keda 137.265 anochi riba nos pais.
Sifranan di yanüari pa novèmber 2017
Un impakto direkto di 821 mion florin a keda generá pa nos ekonomia lokal di yanüari pa novèmber 2017. Un impakto direkto total di 54.1% a keda generá for di turistanan prosedente di Europa kualnan ta responsabel pa un montante di 444 mion florin. Aña pasá europeonan tabata responsabel pa 432 mion florin pues ta trata aki di un oumento di 3%. For di Nort Amérika un oumento di 7% a keda kalkulá den término di impakto ekonómiko direkto. Turistanan prosedente di Nort Amérika ta responsabel pa 179 mion florin pa loke ta trata e promé 11 lunanan di aña 2017. Aña pasá nan kontribushon tabata 167 mion florin. Turistanan for di Sur Amérika i otro regionnan a generá respektivamente 148 i 51 mion florin e aña aki. Na 2016 e montante generá for di Sur Amérika i otro regionnan tabata 172 i 57 mion florin. E kantidat total ku e turista ta gasta ta keda derivá for di e kantidat di anochi ku e turista a keda riba nos pais. Tantu turistanan prosedente di Europa komo Nort Amérika ta kedando mas largu; esaki ta keda reflehá bèk den nan kontribushon na nos ekonomia lokal.
Un total di 358.864 turista di estadia a keda risibí durante e promé 11 lunanan di 2017. Aña pasá a registrá 401.728 turista di estadia durante e mesun periodo, esaki ta un bahada di 11%. Banda di e prestashon negativo di dos sifra den sifranan di yegada pa loke ta trata e promé 11 lunanan di aña, ta sigui mira un bahada leve di 2% den e kantidat di anochinan ku e turista a keda riba nos isla. Total turistanan di estadia a keda 3.196.876 anochi na Kòrsou.
64% di e kantidat total di anochi pa bishitante ta di turistanan for di Europa, representando 2.041.351 anochi for di e region aki den e periodo di yanüari pa novèmber 2017. E kantidat di anochi registrá pa bishitantenan for di Europa ta mustra un kresementu di 3%. For di Nort Amérika, tambe e kantidat di anochi pa bishitante a krese ku 6%. Un total di 480.087 anochi a keda registrá durante e promé 11 lunanan di aña.