WILLEMSTAD- 4 di mei 2014 – Region di Europa a registrá un oumento di 5% den e promé kuartal di 2014. Durante di e periodo aki un total di 49.931 turista di estadia a keda registrá. E mesun periodo aki aña pasa un total di 47.697 turista di estadia a bishita nos isla. E echo ku mas turista europeo a bishita nos durante e promé kuartal di aña a trese tambe un oumentu di 1% pa loke ta trata kantidat di anochi ku e turista a pasa riba nos isla. Un total di 999.523 anochi a keda registrá durante e promé 3 lunanan di aña. Durante e promé kuartal di 2014, sektor di turismo a generá un impakto direkto di 185.8 mionflorin pa nos ekonomia lokal. No opstante e kresementu registrá pa e region di Europa den e promé kuartal di 2014 e sifranan total si a registrá un bahada di 5%. Un total di 108.067 turista di estadia a bishita nos e promé 3 lunanan di aña. Na aña 2013 un kantidat di 113.503 turista di estadia a bishita nos isla. Region di Sur Amérika a konosé un bahada di 19% durante e promé kuartal di aña. Un total di 24.847 turista a bishita nos for di e region aki kompará ku 30.732 na 2013. E region di Nort Amérika a konosé un bahada di 7% durante e promé 3 lunanan di 2014. For di e region aki un total di 20.218 turista a bishita nos pais. E kantidat di turista di estadia for di Karibe a konosé un bahada di 13% durante e promé 3 lunanan di 2014. For di Karibe nos a risibí un total di 7.383 bishitante. E departamentu di investigashon di Ofisina di Turismo di Kòrsou (CTB) huntu ku MEO hasiendo uso di e modelo ‘Turistika’ a kalkulá ku durante e promé kuartal di 2014, sektor di turismo a generá un impakto direkto di 185.8 mion florin pa nos ekonomia lokal. Turistanan ku a bishita nos for di Europa a gasta un total di 92.1mion ku ta igual na 49.6% di e total generá e promé 3 lunanan di aña. Sigui pa turistanan for di Nort Amérika ku a gasta un total di 39.1 mion florin miéntras turistanan for di e region di Sur Amérika a gasta un total di 38.4 mion. E entrada generá for di Karibe den e promé kuartal di e aña aki a keda kalkulá na 9.1 mion. E kalkulashon di kantidat di anochi ta un método importante pa midi e impakto ekonómiko direkto ku sektor di turismo tin riba ekonomia di Kòrsou.E kantidat di anochi ku e turista a keda riba nos isla a subi ku 1%. Un total di 999.523 anochi a keda registrá durante e promé 3 lunanan di aña kompará ku 993.103 e mesun periodo na 2013. Region di Europa a konosé un kresementu supstansial den kantidat di anochi. Un kantidat di 569.128 a keda registrá ku ta 6% mas ku na aña 2013 e mesun periodo. Konsiderando ku mayoria turista ku nos ta risibí ta bini for di Europa e kantidat di anochi registrá for di e region aki tin un influensha positivo riba e kresementu total di kantidat di anochi. Ademas mester remarká ku e estadia promedio di e europeo ta mas largu. E region di Nort Amérika, Sur Amérika i Karibe si a registrá ménos kantidat di anochi. Respektivamente 5%, 10% i 12%. Na sifranan apsoluto esaki ta 148.752, 185.929 i 51.265. E kantidat di turistanan for di e 5 merkadonan prinsipal pa Kòrsou pa loke ta trata e promé kuartal di 2014 tabata; Hulanda ku 37.610 (34.8%), Venezuela ku 16.142 (14.9%) Estádos Unídos ku 13.921 (12.9%), Canada ku 6.297 (5.8%) turista i Alemania ku un total di 4.724 (4.4%). Manera menshoná na publikashon di e sifranan di luna di febrüari ta asina ku CTB ta konsiente di e retonan pa loke ta trata airlift. E echo ku riba diferente ruta tin ménos kapasidat di stul kompará ku 2013 tin su efekto riba e sifranan total di kantidat di turista di estadia. Ademas mester remarka ku mart 2013 tabata e luna den kua aña pasa a registrá mas tantu turista di estadia. E kaida den kantidat di turista di estadia pa un parti tin di haber ku e retonan riba tereno di airlift i e situashon polítiko na Venezuela. CTB ta sigui ku e esfuersonan pa ehekutá diferente forma di promoshon den e merkadonan ku no ta desaroyando positivamente.