WILLEMSTAD- 25 di ougùstùs 2014 – Turismo di estadia na luna di yüli a konosé un oumento di 5% kompará ku yüli 2013. Un total di 36.841 turista di estadia a bishita nos isla durante luna di yüli 2014.  Hulanda kual ta e pais for di kua nos ta risibí mayoria turista a konosé un oumento di 8% registrando un kantidat total di 12.133 turista di estadia. Gran mayoria di nos bishitantenan a bini for di e region di Europa. E kantidat aki a keda kalkulá na 41.3% di e total di bishitante den luna di yüli. For di region di Europa nos a risibí 15.241 bishitante. Esaki ta un oumento di 7%.  Alemania a mustra un kresementu di 10% pa loke ta trata bishitante den luna di yüli. Region di Sur Amérika a registrá 11.327 turista di estadia na luna di yüli 2014, esaki ta nifiká un oumento di 24%. Venezuela a registrá un kresementu positivo, nos a risibí un total di 7.907 turista for di e pais aki, kual ta un oumento di 39%. Brazil a konosé un oumento di 27% pa loke ta e kantidat di turista di estadia. Colombia si a mustra un bahada di 5%. Turismo di estadia for di Nort Amérika a konosé un bahada di 24.7% kompará ku yüli 2013. Manera ta konosí a  anunsiá resientemente e vuelonan di JetBlue entrante 2 di desèmber próksimo. Den kuadro di esaki CTB ta trahando riba diferente inisiativa di merkadeo ku lo start pronto konhuntamente ku JetBlue i hotèlnan lokal pa por krese e fluho di turista for di Merka. Region di Karibe a registrá un bahada di 15.34% na yüli 2014. E sifranan total di turista di estadia pa loke ta trata e promé 7 lunanan di aña ta mustra ku un total di 246.823 turista di estadia a bishita nos pais. Region di Europa a registrá 6% mas turista ku ta representá un total di 107.618 bishitante for di Europa. Sur i Nort Amérika a baha ku respektivamente 6% i 13%. Region di Karibe a konosé un bahada di 15%, ku un total di 19.149 turista di estadia e promé 7 lunanan di aña. Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé 7 lunanan di 2014, sektor di turismo a generá un impakto direkto di 419.1 mion florin pa nos ekonomia lokal. Turistanan ku a bishita nos for di Europa a gasta un total di 198.4 mion ku ta 47.3% di e total generá e promé 7 lunanan di aña. Sigui pa turistanan for di Sur Amérika ku a gasta un total di 101.7 mion florin miéntras turistanan for di e region di Nort Amérika a gasta un total di 77.5 mion. E entrada generá for di Karibe den e promé 7 lunanan di e aña aki a keda kalkulá na 23.3 mion florin. E echo ku region di Europa a sigui desaroyá positivamente a trese kuné un oumentu di 7% den e kantidat total di anochi pa loke ta trata e promé 7 lunanan di aña. E region di Europa tabata responsabel pa mas ku mitar di e kantidat di anochi ku turistanan a keda nos pais. Por bisa ku e kantidat aki ta 7% mas kompará ku e aña anterior e mesun periodo. Konsiderando ku mayoria turista ku nos ta risibí ta bini for di Europa esaki tin un influensha positivo riba e kantidat total di anochi ku e turista ta keda riba nos isla. E region di Sur Amérika a registrá un kresementu di 8% den kantidat di anochi pa loke ta trata e promé 7 lunanan di aña. Pa loke ta trata Nort Amérika i Karibe si e kantidat di anochi registrá tabata ménos.