Willemstad – 25 di Novèmber 2014. Prinses Wilhelmina Fonds ta presentá e último presentashon di e eksitoso obra  “Na Dòkter” djasabra awor dia 29 di novèmber pa 9’or di anochi den Teatro “La Tentashon.”  Prome ku e presentashon di e obra lo tin presentashon di un Aquinaldo di 8’or pa 9’or. “Na Dòkter”  ta un obra humorístiko kaminda e públiko por hari su barika yen ku esenanan ku ta tuma lugá den un sala di espera di un konsultorio di dòkter.  Ta e obra ku a inisiá e aña hubilario di 65 aña Prinses Wilhelmina Fonds, komo tal e fundashon ta klousurá e selebrashon ku e obra tambe.  Karchinan pa e último presentashon di e obra aki ta optenibel na ofisina di Prinses Wilhelmina Fonds , na takia di Teater Luna Blou i na Mensings Caminada a rason di Nafl. 25,-  Ta rekomendabel buska bo karchi trempan ya ku e obra aki tabata un sold out kompletu den su promé presentashonnan. “Na Dòkter” , ta  inisiativa di señora Hilda “ Dachi” Vinck- Leanez.  Outor di e obra ta Mercee Doran.  Direkshon di e obra ta den man Diana Lebacs i Rina Penzo.  E obra ta konta ku aktuashon di un elenko di klientenan di Prinses Wilhelmina Fonds mes ku danki na e bon guia i entrenamentu a kombertí nan mes den tremendo artistanan.  Banda di nan e obra ta haña su sous humorístiko speshal ku aktuashon si Finchi Statia i Dwight de Windt. Señora Hilda “Dachi” Vinck- Leanez, ku pa  hopi aña fielmente a duna lès den diferente obra di man na miembronan di Prinses Wilhelmina Fonds. Soño di Dachi tabata pa introdusí  un  otro tipo  di terapia, kaminda tur  hende tin chèns di deskubrí nan talento  i aktua den un komedia.  Ku presentashon di e obra “Na Dòkter” e soño aki a bira realidat.  Huntu ku un tim di eksperto di Grupo di komedia Thalia, a traha duru  pa dirigí un grupo di kliente di tal forma ku awe Kòrsou por gosa di un tremendo obra. Un i tur ta keda invitá pa bin wak e obra humorístiko “Na Dòkter” ku di bèrdat lo ponebo hari bo barika yen i yuda ku un bon kousa. Prinses Wilhelmina Fonds kier ofresé su diskulpa na personanan ku a kumpra karchi di entrada pa e komedia na Teatro Luna Blou dia 29 di Novèmber  pa 2’or di merdia. E personanan aki lo por hasi uso di nan karchi dia 29 Novèmber na La Tentashon 9’or di anochi.