Minister Otmar Oduber cu atencion debido pa monumentonan

Recientemente a anuncia inicio di e trabounan na un icono turistico situa na Hudishibana, e Californa Lighthouse. Durante e anuncio oficial Minister Otmar Oduber a hiba palabra expresando su satisfaccion pa yega na e punto aki y pa mira tur e entidadnan trahando hunto. Entidadnan manera Monumenten Raad cu un rol hopi mas activo awor, Monumentenfonds y Monumentenbureau.

Monumentenbureau cu un enfoke riba e aspecto legislativo ta trahando riba leynan di proteccion pa nos monumentonan cu mester tuma luga unda mientrastanto a aproba un lista di 36 monumento tanto publico como priva cu awor lo wordo proteha. Antes mayoria monumento proteha ta edificionan di gobierno pero dentro di poco lo añadi edificionan priva tambe riba e lista di monumentonan na Aruba cu lo conta cu proteccion legal.

Minister Oduber ta bisa: “Nos a percura pa tur e entidadnan nan nanishi ta den mesun direccion pa cumpli y pa mas tanto posibel e monumentonan por haya nan restauracion, y percura pa esunnan cu den pasado ya caba a haya un restauracion pa nan haya e mantencion tambe manera a bin ta tumando luga recientemente.” E mandatario a referi na por ehempel e edificio di Henriquez-Pand unda Monumentenbureau ta ubica y dentro di poco Algemene Rekenkamer cu lo ta na turno ainda e aña aki y tin un gran cantidad di otro proyecto na San Nicolas tambe cu a inicia manera ta Nicolaas Store y tambe ta den proceso Uncle Luis Store y asina por menciona mas.

Proceso di restauracion di Monumento no ta bay di facilmente y tin un periodo largo prome cu trabounan por inicia. Un bon ehempel ta e California Lighthouse unda cu pa basta tempo a anuncia esaki y awor por fin ta na e inicio di e trabounan di restructuracion. Ta pa e motibo aki Minister Oduber a duna reconocimento na cada un di e departamentonan gubernamental envolvi cu henter e proceso aki. Tambe no por a keda sin menciona e sector priva cu tin un atencion special pa inverti den proyectonan manera ta nos monumentonan cual ta nos herencia tangibel.

Minister Oduber ta termina bisando: “E esfuersonan aki di tanto sector priva como esun publico ta loke ta logra e tipo di proyectonan importante aki, cu ta mantene nos historia bibo, no solamente pa nos pero pa nos futuro generacion y tambe pa nos esunnan cu ta bishita nos sa un tiki mas di nos cultura y di nos raisnan y pa locual nos ta para p’e.”