“Dream Believe Achieve” sosteniendo nos atleta Liemarvin Bonevacia
WILLEMSTAD, 20 yüni 2016 – UTS, nos kompania nashonal di telekomunikashon ku semper ta sostené esfuersonan positivo, espesialmente deporte, huntu ku Fundashon Desaroyo Deportivo Kòrsou (FDDK), ku hopi orguyo ta lansa kampaña olímpiko ku e tema “Dream Believe Achieve”, sosteniendo asina nos atleta prometedor, Liemarvin Bonevacia rumbo pa Rio 2016.
E inisiativa aki ta un oportunidat úniko pa nos uní forsa, pa huntu nos karga i sostené Liemarvin, p’e logra su soño di bini kas ku medaya olímpiko. Liemarvin Bonevacia (27), un atleta prometedor, unu di nos mes, ta un ehèmpel sólido di trabou duru, determinashon i perseveransia. Liemarvin lo bai kompetí durante olimpiada den e kareda di 400m ku e meta pa kibra su propio rèkert i logra un tempu di 43 sekònde, un tempu ku solamente 11 persona na mundu a logra te ku aworakí. Ta konosí ku e tin hopi chèns pa gana medaya i su dedikashon i gran logronan den e último kompetensianan rumbo pa Rio, ta algu di apoyá sigur! Esaki ta brinda un tremendo oportunidat pa un biaha mas Kòrsou marka historia i sigui bira mas konosí riba mapa mundial.
Den e dianan benidero, UTS huntu ku FDDK, lo bai kompartí delaster un akontesimentu i trese diferente grabashon i imágen te den bo kas, p’asina ilustrá e preparashon di Liemarvin rumbo pa Rio 2016. Naturalmente nos lo bai ta presente na Rio 2016 tambe, p’asina trese e imágennan i akontesimentunan aki tambe p’abo. Por sigui tur esaki atraves di TeleCuracao i tambe nos página di Facebook: www.facebook.com/utscuracao. Ademas, riba kanal 69 di TDS tambe bo por haña tur esaki mira. Di e forma aki nos ke laga bo sera konosí mas di aserka ku Liemarvin, alabes biba i eksperensiá kada momentu di su soño, preparashon, éksito, trabou duru i lágrima huntu ku nos yu di tera, komo UN pais.
Aparte di por sigui e bida di Liemarvin di aserka durante su preparashon pa Rio 2016, UTS ta bai duna su klientenan e oportunidat pa gana e trep di nan soño, p’asina nan tambe por djòin Liemarvin na Rio durante olimpiada 2016. Lo bai tin diferente kampaña fabuloso, kaminda klientenan por disfrutá di diferente benefsio i alabes risibí e chèns úniko pa gana un biahe pa dos persona pa djòin Liemarvin na Rio durante Olimpiada 2016. Pues algun kliente di UTS ta bai tin e privilegio di por eksperensiá pa nan mes e realisashon i partisipashon na Rio den luna di ougùstùs.
UTS ta rekonosé i sostené individuonan ku tin un ambishon i ta duna mihó di nan mes pa realisá esaki ku e rekursonan disponibel. Di e forma aki nos ta motivá siudadanonan pa biba pa un kousa, enkurashá soñadónan pa bira mas aktivo i produktivo i promové tur ‘Bon Yu Di Kòrsou’ pa nan kontinuo dedikashon i perseveransia. Tur esaki, ku e speransa ku mas persona ta sigui e kaminda rekto i traha duru pa realisá nan propio soño.
UTS ta kere firme den Liemarvin Bonevacia i ta konvensí ku su historia ta bai trese speransa den hopi persona su bida i alabes duna esnan ku tin mester di un èkstra empuhe, e guia i inspirashon nesesario pa tuma akshon pa por logra nan soño. Por último, UTS, komo su spònser eksklusivo pa loke ta trata telekomunikashon, ta deseá Liemarvin tur klase di éksito den olimpiada 2016.