Willemstad 26 di mart 2014 – Manera a keda publiká anteriormente, for di aña pasá na sèptèmber, durante e migrashon di un kantidat di kliente postpago riba e sistema di kobransa nobo di UTS, a surgi problemanan imprevisto, kual a okashoná retraso den produkshon di resibu. Mester bisa ku te ku aworakí, ya gran mayoria di kliente a risibí nan resibunan kaba, pero ainda falta un kantidat. UTS, bon konsiente di e eventual inkumbiniensia ku e situashon aki ta trese kuné i pa yuda aliviá esaki un tiki mas, ta introdusí diferente manera mas, kual ta muchu mas fásil i efisiente, pa klientenan por haña sa nan saldo habrí. Tradishonalmente klientenan ku no a risibí nan resibu ainda, por chèk nan saldo via 9242, ‘miUTS’ riba www.uts.cw òf na kualke UTS Store òf punto di pago di UTS. Pero for di awe, aparte di e maneranan tradishonal aki, klientenan por hasi uso di e otro posibilidatnan aki tambe: Via di SMS. Kliente por manda un SMS na 1122 menshonando su number di kontrato i e lo risibí su saldo habrí via di e SMS aki. Debí na limitashon di espasio di SMS, ta solamente e saldo ku ta habrí, huntu ku e kantidat di resibu ku tin habrí relashoná ku e saldo aki, e kliente ta haña mira.  E SMS aki ta kompletamente grátis i por mand’é solamente for di Chippie. Via di www.uts.cw. Kliente por bishitá www.uts.cw, klik riba e ‘icon‘ ‘Check your invoice balance’ na bo man drechi mas abou i aki tambe e ta yena e number di kontrato, p’asina e saldo habrí aparesé. Hasiendo uso di e opshon aki, e kliente por mira e saldo habrí di kada resibu, ku ta monta un total, pero tambe e periodo di uso. Via 0800-0777. Esaki ta un number adishonal ku UTS a pone disponibel di djaluna pa djabièrnè for di 8’or di mainta te ku 9’or di anochi, pa klientenan por yama i pidi pa nan saldo habrí. Aki e kliente tin dos opshon, e por sea duna e number di kontrato òf e number di telefòn pa e por haña su saldo habrí. Tene kuenta si ku ora e kliente skohe pa duna e number di telefòn, algun informashon adishonal lo wòrdu puntrá promé ku e haña su saldo habrí. Aki tambe e kliente ta haña solamente su saldo habrí huntu ku e kantidat di resibu i tambe e periodo di uso. E number aki por wòrdu yamá for di liña fiho lokal di UTS òf Chippie i e ta kompletamente grátis. Via di kòmpiuter den UTS Store òf punto di pago di UTS. Klientenan ku bishitá sea un UTS Store òf un punto di pago di UTS, por subi e kòmpiuternan ku UTS a pone disponibel, p’asina nan por aksesá www.uts.cw pa wak nan saldo habrí manera menshoná na punto 2. Si un kliente no tin saldo habrí, e opshon ku el a skohe, lo notifik’é esaki. Tambe si un kliente hinka un number di kontrato robes òf e pone otro dato huntu ku e number di kontrato na opshon 1 ku 2, e kliente lo risibí un mensahe bèk bisando ku e number di kontrato ei no ta eksistí. P’esei ta bon pa kòrda klientenan pa semper tin nan number di kontrato na man i pa hinka solamente e number aki korektamente, sin ningun dato òf teksto adishonal, na opshon 1 ku 2. Ta bon pa enfatisá tambe ku ta solamente e saldo habrí ta keda duná via e kuater maneranan menshoná aki riba. Si klientenan ta deseá informashon adishonal relashoná ku nan saldo habrí, nan por hasi esaki via e maneranan tradishonal ku ta yama na 9242, aksesá ‘miUTS’ òf bishitá kualke UTS Store òf punto di pago di UTS. UTS kier kòrda tur kliente tambe riba e diferente lokalidatnan i manera pa nan hasi pago di nan resibu(nan): puntonan di pago na Brievengat i Sta. Maria, tur UTS Authorized Distributors, online banking òf tur puntonan di pago di Pagomátiko i Pagafásil . UTS, den su afan pa keda bini ku inovashon i tambe pa sigui brinda pueblo di Kòrsou mas i mihó servisio, ta kontentu di por brinda su klientenan e otro posibilidatnan aki tambe relashoná ku saldo habrí, p’asina yuda aliviá e situashon di retraso di resibu un poko. No opstante esaki, UTS ta bolbe pidi su diskulpa pa e eventual inkumbiniensia ku henter e situashon aki ta trese kuné i alabes ta gradesí su klientenan atrobe pa nan pasenshi i komprenshon. Manera a keda publiká siman pasá, UTS ta sigui traha intensivamente pa normalisá e situashon aki i ta spera ku pa fin di aprel 2014 lo no tin retraso di resibu mas.