Willemstad, 4 aprel 2013 – UTS ta balorá e konfiansa di su klientenan. P’e motibu aki diariamente UTS i su personal ta buska formanan pa fasilitá bida di e klientenan i próksimamente lo introdusí instrumentonan ku ta duna e kliente mas oportunidat pa e mes por manehá su kuentanan i tambe opiná riba e servisio ku e ta risibí riba personal di UTS.
Vigilá bo kuentanan residenshal aldia riba www.uts.cw/miuts
Klientenan residenshal, i pronto klientenan komersial tambe, por vigilá nan kuentanan aldia dor di bai awor riba www.uts.cw i klik riba miuts. Ántes bo por a vigilá bo kuenta atraves di mikuenta.com, pero awor ku miuts riba www.uts.cw un mundu nobo ta habri. Aki e kliente por haña un bista di tur yamadanan ku a drenta i sali plùs nan durashon. Esaki lo ta dividí den yamadanan, sms i data. E kliente lo tin tambe mihó bista riba su kostonan di roaming. E kliente por risibí tambe bista riba fakturanan den pasado i wak ku nan ta paga si òf no. Lo e por mira tur kuentanan di tur kòntrakt individual. E fasilidat nobo aki ta hasi akseso na online banking di mayoria banko posibel. Pa e promé uso so, e kliente mester akudí personalmente na kualke UTS Store pa por risibí su kódigo. E kódigo aki lo no ekspirá i por keda optené despues i kambiá online mes. Tur kliente ku tabata hasi uso di mikuenta.com por hasi uso di e fasilidat di miuts riba www.uts.cw trankilamente.
Bo opinion ta konta
UTS ta balorá opinion di su klientenan i ke tende di nan kon nan ta eksperensiá i balorá e servisio ku UTS ta duna. UTS próksimamente ta bini ku un inisiativa pa haña opinion di su klientenan. Kada empleado di UTS ku presta servisio lo entregá un tarheta ku su informashon (nòmber i departamentu kaminda e ta traha) i tambe akseso na www.uts.cw/boopinion. E kliente e ora ei por bai riba e website i yena un enkuesta, dunando su opinion ‘online’. Aki e lo haña 8 pregunta tokante kalidat di e servisio ku el a risibí. Unabes e yena e enkuesta e kliente ta haña chèns di partisipá pa gana un premio atraktivo kada luna. E promé premio lo ta un BlackBerry Curve 9380 touch screen.
UTS lo hasi uso di e informashon risibí pa mehorá su servisio. P’esei tur kliente ta keda enkurashá pa duna nan opinion, partisipá na e enkuesta i ku chèns di gana premionan atraktivo tambe.