E ekipo di VS Excellence a titula kampion di e torneo di futbol CWM/EWP 2017den kategoria U-13 ku a tuma luga fin di siman ultimo den e stadion di Asiento na Rust en Burgh. Meskos ku ana pasa VS Excellence a logra gana di VESTA i bai ku e titulo maksimo. E partido final tabata kulminashon di tres dia di

kompetensha ku partisipashon di 8 ekipo (VESTA, SUBT, Willemstad, Excellence, Atletiko Salina, Sithoc Marchena, Jong Holland i Scherpenheuvel) estilo triple elimination, den kua tabatin un ronda di ganado i un di perdedo, pues ekiponan ku a perde nan prome weganan, ahinda por a bini bek i resulta den e weganan

di semi-final. Prome ku e torneo tabata tin 4 dia di klinika pa muchanan i tambe pa e coachnan ku Voetbalschool Soccer 10 a enkarga di dje.

E ana aki a skohe dos hungado mas balioso di e torneo, Melbourne Marques Ricardo di Excellence i Derlph Saintilus di Vesta a base di nan dedikashon, deportivismo, disiplina i liderasko demostra durante di e torneo. Nan a risibi e trofeo di Most Valuable Player pa e ana aki. E hungadonan aki lo partisipa na e Milan Junior Camp Day na Milan, Italia otro ana den luna di Mart 2018.

Cafe Barista a soru pa tur mucha a hanja snek i kuminda saludabel durante di e henter e siman di klinika i torneo.

Curacaosche Wegenbouw Maatschappij i Eigen Woning Plan (CWM/EWP), Milan Junior Camp Caribbean i Voetbalschool Soccer 10 por mira bek riba un torneo sumamente eksitoso, ku alabes ta e terser i ultimo edishon di e torneo di futbol di CWM EWP. CWM EWP lo sigi duna su aporte na deporte den e forma di e patrosinio di Churandy Martina pa Olimpiada na 2020!