ORANJESTAD – Minister encarga cu Turismo Otmar Oduber despues di persistencia den su lobbymento cerca aerolineanan, a haci un anuncio positivo pa turismo di Aruba. E mandatario a duna un declaracion na aeropuerto Internacional Reino Beatrix bisando cu e logro aki ta debi na empeñonan di Oficina di Turismo, aeropuerto, partnernan y su oficina.

“Awe nos tin e honor, despues cu JetBlue a haci e anuncio oficial, ampliacion di e cantidad di asientonan extra pa e winter schedule,” Minister Oduber a duna di conoce. Pa e logro aki e mandatario a felicita aeropuerto di Aruba, e team di Oficina di Turismo, kendenan durante mas di un aña a participa den e deliberacionnan.

Tur e reunionnan cu a bin ta tumando luga pa casi un aña a concentra riba aumento di cantidad di vuelonan, capacidad di stulnan, y tipo di avionnan cu ta wordo uza. Esaki a trece cune un aumento di capacidad cu 4% reparti entre e diferente partnernan.

Minister Oduber y su colaboradornan riba tereno di turismo a logra convence JetBlue pa cuminsa cu un vuelo diario for di Fortlauderdale. E lo bay ta un vuelo regular cu lo cuminsa cune den luna di januari, 2017. “Esaki ta un noticia sumamente positivo cu lo conduci tambe na un aumento di 7% pa loke ta trata e cantidad di stulnan cu ta bay tin disponibel, cu ta esun di mas halto cu a yega di logra pa Aruba. Di e forma aki ta amplia e presencia di Aruba na Merca y crea un demanda mas halto for di e Mercado aki pa pais Aruba.”

E mandatario a splica cu den pasado semper a bisa cu turismo ta hopi flexible, e ta sensitivo, pero dificil pa midi door di tur loke ta sosode den e diferente mercadonan unda Aruba ta activo. Por corda e period di 2008-2009 unda mester a crea un strategia nobo mirando e situacion cu Merca tabata pasando aden. A diversifica bayendo den Mercado di Latino America cual tabata sumamente positivo, pero despues di algun aña a constata cu Merca un biaha mas a bira e Mercado fuerte pa pais Aruba. Pesey e tempo ey a traha pa bini cu un diversificacion denter di e Mercado Mericano tambe. “Cu esey den mente, hopi trabou a wordo haci pa cual awe nos ta anuncia e prome di un serie di bon noticia cu nos tin riba e cantidad di stulnan y e strategia pa sigui diversifica e Mercado Mericano. Den e simanan nos dilanti nos ta spera di habri otro mercadonan, partinan importante na Merca. Pero tambe trahando riba Mercado Europeo y Latino pa percura cu e cantidad di stulnan ta presente pa conhunto cu partnernan local ofrece e acomodacionnan mas atractivo den region pa sigui mira e exitonan cu nos a conoce e ultimo añanan.”