Willemstad – Djasabra dia 12 di yüli di un manera hopi eksitoso Parke Tropikal a habri su portanan bek pa publiko. Un di e aktividatnan ku sigur a hala hopi atenshon i publiko ta e Zoovie Picnic Night ku ta tuma luga tur djasabra anochi den Parke Tropikal. Despues di apenas dos siman por a nota e interes grandisimo pa bishita e anochi di pelikula. Asina pa e proksimo djasabranan a amplia e Zoo-bar na 2 stent. Kue ampliashon di e Zoo-bar aki tur bisitante por keda sirbi mas rápido. Muchanan ta bin asta ku kot i slaapzak pa bin disfruta di un dushi pelikula den airu liber kaminda den bes enkuando asta por tende e leon ‘King’ brul den background.

Zoovie Picnic Night

Pa un montante di solamente 5 florin pa persona por disfruta di un pelikula den airu liber riba un big screen. Uniko kos ku mester trese ta bo kama di pushi, stul of laken pa sinta riba dje. E pelikula tur siman ta un sorpresa pero tur ta pelikulanan tin di haber ku bestia i ta apto pa famia kompleto. E portanan ta habri for di 7 or di anochi i e pelikula ta kumisa mitar di 8 en punto. E fechanan pa e siguiente Zoovie Picnic Night ta 26 di yüli, 2 i 9 di augustus. Pa seguridat di nos bestianan no ta permiti mas pa drenta parke ku konsumo propio. Pesei awor tin un Zoo-bar ku tin un sortido varia di koi bebe i snacks i awor a amplia esaki na 2 bar. Pa e mayornan ku ta buska un aktividat leuk pa bai ku nan yunan esaki sigur ta un ku nos ta rekomenda. Sea den dia of anochi Parke Tropikal ta keda un luga kaminda grandi i chiki por sinja i diverti. Orario di Parke Tropikal ta di djaluna pa djadumingu di 10 or di mainta pa 5 or di atardi. Entrada pa parke manera semper ta gratis.