“Luna Yen New & Improved”:

Willemstad, Luna Yen e show di talento mas gustá bou di hóben ta bai ranka sali, e aña aki ku un dimenshon nobo. Banco di Caribe, ENNIA, Refineria Isla, Coca Cola, Autocity Gobièrnu di Kòrsou, Teatro Luna Blou i La Tentashon ta presentá Luna Yen den bo Bario. Luna Yen ta un kompetensia na unda ku hóbennan por demonstrá nan talento den diferente disiplina artístiko.  Durante e añanan Luna Yen a bin ta krese mas i mas,  e aña aki- meskos ku tur otro públiko por spera un show tur afó. Pa e trayekto di e aña aki Luna Yen lo ta den diferente bario di Kòrsou buskando talentonan ku por partisipá den e gran final di Luna Yen. E barionan ku lo wòrdu bishitá ta Wishi-Marchena, Barber, Sta. Rosa, Punda i Boka Sami. Hóbennan ku inskribí tin tres opshon: E promé opshon ta enserá e parti di tayer só. Pues e hóbennan ku inskribí ta risibí diferente tayer di e disiplina ku nan a skohe. Pa esaki muchanan for di 6 aña por partisipá.  E di dos opshon ta enserá tayer i oudishon. Esaki ta nifiká ku durante un siman e hóben ku inskribí lo haña tayer den e disiplina ku nan skohe. Na final nan lo duna un presentashon ku alabes lo bira nan oudishon pa e gran final di Luna Yen. E opshon aki ta pa hóbennan for di 14 te ku 22 aña.  E terser opshon ta oudishon só. Akinan e hóben ku inskribí no ta sigui e diferente tayernan, pero nan mester tei presente sí durante di e training general i e oudishon. Esaki tambe ta pa hóbennan for di 14- te ku 22 aña. E lo tuma lugá den desèmber próksimo na La Tentashon.

Tokante Ganadónan:

E ganadónan di Luna Yen ta haña e oportunidat pa bai partisipá den Kunstbende na Hulanda, Dutch Caribbean Youth Art Festival i diferente festival mas den Caribe.  Aña pasá tabata e grupo di hóbennan kantante “Chosen Stars” ku a sá di sali e ganadó apsoluto di Luna Yen 2013. Ken lo ta e ganadó (nan) e aña aki? Esaki por ta Abo!  E promé oudishon lo tuma lugá dia 28 di sèptèmber den bario di Wishi-Marchena. Pa mas informashon tokante skema di bario, tayernan i oudishonnan bishitá e websáit : www.lunablou.com òf e facebook page Teatro Luna Blou. Tambe por yama Teatro Luna Blou na 462-2209. Banco di Caribe, ENNIA, Refineria Isla, Coca Cola, Autocity, Gobièrnu di Kòrsou, Teatro Luna Blou i La Tentashon ta invitá bo pa no pèrdè e oportunidat pa demonstrá i desaroyá bo talento.