Kòrsou sentro di atenshon durante 4 dia na Florida


WILLEMSTAD- 21 di yüli 2014: Resientemente Ofisina di Turismo di Kòrsou (CTB) a tene un ‘Road Show’ di 4 dia na e parti sùit di Florida. E programa a konsistí di un evento na Wedding Salon na Miami, ‘sales call’ na Brickell Travel, reunion i presentashon pa Top Vacations, presentashon pa prensa, reunion ku Travelmax i finalmente a tene un ‘Curaçao Celebration’ pa presentá tur loke Kòrsou tin di ofresé tantu na Miami komo Ft. Lauderdale. Meta di e 4 dianan di e ‘Road Show’ na Florida tabata pa por medio di  diferente reunion, presentashon i eventonan mustra e mihó di Kòrsou. Huntu ku e diferente partnernan den turismo CTB a kuminsá e ‘Road Show’ ku e evento na Wedding Salon ku a konta ku presensia di vários futuro brùit i brùidehòm ku ta mira Kòrsou komo un destinashon perfekto pa kasamentu. Komo ku Kòrsou tabata un di e patrosinadónan di e evento, un rekuerdo di Kòrsou a keda inkluí den 300 pakete di regalu; adishonal na esaki a opsekiá un biahe pa Kòrsou kortesia di Hilton Curaçao i InselAir. Seguidamente, CTB huntu ku su partnernan a forma parti di diferente aktividat i eventonan diseñá pa promové Kòrsou. Despues a sigui un bishitá na e ofisina di Brickell Travel Management kual ta e kompania lider den  maneho di biahe mas renombrá na Florida. Durante e bishita aki representantenan di Kòrsou a haña oportunidat di duna un presentashon na e agentenan di e kompania. Reunion ku Top Vacations tambe tabata parti di e programa. Top Vacations ta un operador di tour masha dinámiko kual ta preparando pa diseñá un programa di Kòrsou spesialmente pa nan klientenan na Florida. E partnernan presente a haña e oportunidat pa introdusí i presentá nan produkto na Andrea Lopez ku ta Contracting and Product Manager na Top Vacations. Ademas di esaki Diamond PR kual ta e agensia ku ta representá Kòrsou na Merka i Canada a tene un presentashon pa e partnernan den turismo kaminda a pone énfasis riba kon pa trata media i kon pa saka lo máksimo for di bishitá di kada miembro di prensa. Adishonalmente a organisá tambe un evento pa prensa/media merikano pa siña nan un poko mas di Kòrsou. Entre esnan ku a forma parti di e evento aki tabatin: BBC, City & Shore Magazine, Sun-Sentinel, Worthy Magazine i Private Islands Magazine. Finalmente e partnernan den turismo a risibí oportunidat pa sera konosí ku Lucy Leyva presidente di Travelmax i Valetin Ortega representante regional di Copa Airlines na CTB su ofisina na Miami. A klousurá e ‘Road Show’ ku un selebrashon tur afó dediká na Kòrsou ku a konta ku presensia di 200 miembro di agensianan di biahe i partnernan na Florida. A kompletá e selebrashon ku presentashon di Ephrem J i su banda kompañá pa DJ Carlito, Enmeris i Woody. Hinter anochi a pasa imágennan di Kòrsou i partnernan hotelero riba pantaya. CTB por mira bèk riba un ‘Road Show’ eksitoso. Ta gradisí CHATA, ACOYA Curaçao, Avila Hotel, Baoase Luxury Resort, Curaçao Marriott Beach Resort & Emerald Casino, Floris Suite Hotel, Hilton Curaçao, InselAir International B.V., Kura Hulanda Village & Spa, GHL Hotel / Kura Hulanda Lodge & Beach Club, GHL Hotel, Livingstone Jan Thiel Resort, Renaissance Curaçao Resort & Casino, Santa Barbara Beach & Golf Resort Curaçao i Sunscape Curaçao Resort, Spa & Casino pa nan partisipashon na e ‘Road Show’.RoadshowFlorida2