WILLEMSTAD —  Djaweps 10 yüli Minister Palm a presentá su vishon pa e ekspanshon di e área di Mega Pier durante di un rueda di prensa. Turismo ta e prioridat number unu di Minister Palm i inisio di e proyekto aki ta un empuhe pa sigui traha pa hasi turismo di Kòrsou mas grandi. Na aña 2012 e kantidat di turistanan krusero ku a bishita nos isla tabata 450 mil, na aña 2013 e tabata 600 mil kua ta un muestra ku e sektor ta sigui krese. E vishon di Minister Palm ta pa aña 2020 Kòrsou yega 1 miyon turista krusero ku ta bishita nos isla. Mirando e kresementu di e bishitantenan ta importante pa nos amplia nos kapasidatnan pa mas barku por mara den nos haf. Minister Palm a haña importante pa mantené e di dos pier den e area di Rif pa asina stimulá mas aktividat komersial den sentro di suidat. Den transkurso di dianan lo por mira trabounan tumando lugar. Esakinan lo ta trabounan di entre otro estudio di tera i profundidat ku ta nesesario den kuadro di konstrukshon di e pilarnan di e pier. Den e promé mitar di aña 2015 lo kuminsá ku e konstrukshon di e Mega Pier mes i ku lo keda finalisá pa e temporada haltu di bishita di e barkunan den 2016. Un petishon spesífiko di Minister Palm pa ku e diseño di e RIF SEAPORT CURACAO tabata pa e komunidat tambe haña akseso na e área aki. Esaki a keda inkluí tambe den e plan. Tambe Minister Palm a indiká ku lo ta un kondishon pa kompanianan lokal hasi e trabounan nesesario pa realisashon di e proyekto aki. Minister Palm ta kontentu di por anunsiá ku RIF SEAPORT CURACAO lo bira un realidat; un eksperensha ku balor agregá pa nos bishitantenan i komersiantenan, kaminda komunidat di Kòrsou tambe por gosa di dje i ku lo nifiká mas empleo pa nos mes hendenan.