WILLEMSTAD- 28 di yüli, 2014:- Resientemente representante di Ofisina di Turismo di Kòrsou (CTB) pa loke ta trata Sürnam, huntu ku representante di Plaza Hotel Curaçao, Livingstone Jan Thiel Resort Curaçao, Acoya Hotel Suites & Villas i Santa Barbara Beach & Golf Resort Curaçao a partisipá na e feria ehekutivo, United Business Fair, ku tabata tin na Paramaribo, Sürnam. E di 3 edishon di United Business Fair a wòrdu organisá den e lokalidat spesial pa feria i konferensha di KKF na Paramaribo durante dianan 4, 5 i 6 di yüli. Promé ku e feria representantenan di Curaçao North Sea Jazz Festival (CNSJF)a tene un konferensha di prensa na unda a informá e pueblo di Sürnam di e festival musikal mas grandi den nos region. Djasabra 5 di yüli CTB a duna un show di ekshibishon na unda ku a modelá entre otro blusa, pèchi i tasnan di e CNSJF ku lo ta optenibel promé i durante di e festival. E show di moda sigur a krea aún mas interes pa e festival ku lo tuma lugá na fin di ougùstùs próksimo. E delegashon di Kòrsou ku a partisipá na e feria ehekutivo na Paramaribo ta unu ku nos por ta orguyoso di dje. E feria a wòrdu bishitá pa kasi 6000 bishitante i empresario, 14.000 persona a bishita e website i kasi 30.000 persona por a wak e “Live Broadcast” na Apintie TV. Pues un bes mas Kòrsou a probechá di un eksposishon internashonal i a logra amplia plataforma pa un otro gremio di turista.