A konta ku partisipashon di hóbennan di Kòrsou, Aruba, Boneiru, St. Maarten, Saba, St. Eustatius i  Hulanda

WILLEMSTAD- Ougùstùs 2014: Tabata den fin di siman tras di lomba ku a finalisá Dutch Caribbean Youth Art Festival (DCYA). E tema prinsipal tabata “Brotherhood”. Den e obranan ku a keda presentá e hóbennan a inkorporá e 4 elementonan- tera, bientu, awa i kandela. E hóben super talentoso for di St.Maarten, Rayangel Boasam a guia e presentashon dor di trese dilanti kuater poesia rítmiko, kada unu relashoná ku un di e elementonan. Tabata tin presentashon di aktuashon, baile i kanto. Públiko a biba ku e hóbennan durante nan presentashon. Na final e hóbennan a risibí un ‘standing ovation’ serka públiko presente. Ademas di esaki por hasi menshon ku e hóbennan ku a partisipá den tayer di kanto, bou di guia di Xemio Jacobs a komponé i graba un piesa ku nan a pone riba un cd. A logra graba un videoclip tambe. Na final di e presentashon tur e hóbennan a haña un cd i públiko por a kumpra esaki pa nafl.5,-.  Durante di e presentashon di baile djaweps, Remses “Muis” Rafaela a traha un koreógrafia ku a ser presentá dor di un grupo di hóben sumamente talentoso. E show titulá “Muis back in Town” a laga públiko impreshoná ku e talento di e hóbennan, mirando e nivel di koreógrafia ku a ser presentá i e tempu rekòrt (1 siman) den kual nan a sá di ensayá esaki. Finalmente djadumingu e hóbennan a regresá nan respektivo pais bèk. E festival a resultá den un interkambio kultural artístiko masha eksitoso entre Kòrsou, Aruba, Boneiru, St. Maarten, Saba, St. Eustatius i  Hulanda. Teatro Luna Blou i La Tentashon ta gradisí Banco di Caribe, Cultuur A, ENNIA i Refineria Isla pa nan sosten den realisashon di e promé Dutch Caribbean Youth Art Festival (DCYA). Riba fotonan athuntu por tuma nota di algun momentu kulminante di DCYA 2014.