TV-11 a yama ATV bon bini riba mercado Boneriano


ORANJESTAD, Aruba – 18 di augustus 2013: Pa hopi aña diferente medio di comunicacion na Corsou y Boneiro a trata di haya e señal di ATV riba un base constante pa enrikece nan fuente di informacion pa nan mercado local. Cada biaha sinembargo e aspectonan tecnico tabata un barera. No mucho tempo atras Patrick Dowling, gerente general di Flamingo TV tabata na Aruba pa combersa cu su homologo na Aruba Broadcasting Company (ATV), Tom Pietersz y den un tempo record nan a logra pone tur e rekisitonan riba un linea pa asina por a ranca sali. Diahuebs ultimo tabata asina leu cu ATV a cuminsa cu su transmision 24 ora pa dia riba e mercado di Boneiro y esaki a bay den e forma creativo di ATV cu ya comunidad a custuma cune caba. A haci un set di entrevista na Boneiro cu personanan cu tin añanan largo ta anhela di por mira ATV su noticiero dinamico, su programanan exclusivo y atractivo y su elenco di talentonan cu ta asina bon mira tur caminda cu nan bay. Tambe ATV a papia cu algun personahe  Boneriano biba na Aruba, kendenan a ratifica y confirma con grandi e deseo ta pa mira ATV na Boneiro y cu nan ta contento di tende di nan famia y conoci nan aya cu porfin ta asina leu. Sin duda e toke special a bin Diahuebs anochi ora cu dilanti di un set crioyo, e banda popular “Rincon Boys” a habri “Noticia Awe Nochi” cu nan tononan Boneriano, cu ta bon pega tanto na Aruba como na Boneiro. E quinteto presente a sigui anima henter e ora di noticia den un forma sumamente entusiasma y alegre, poniendo e crew tecnico di ATV baila mas cu traha. Asina mes e crew a percura pa core un show strak di noticia. Lansamento di ATV na Boneiro-AUG2013ATV Aruba a cuminsa cu su transmisionnan na September 1996 y a sa di haci un diferencia grandi den e industria di television riba nos isla. No solamente pa su noticiero “Noticia Awenochi” pero tambe pa su demas programacion y transmisionnan bibo for di diferente evento. Cu un elenco di presentadonan y reporteronan capaz di entretene y informa e comunidad den gran forma.