Banco di Caribe ta sostené CuBaFe pa kampionato 2016

WILLEMSTAD- Aprel 2016:  “Ku hopi satisfakshon mi a tuma nota di timnan di basketbòl ku djasabra último a partisipá na e promé weganan di Playoff di CuBaFe”, esaki di akuerdo ku sr. Dito de Kort Managing Director di Banco di Caribe. “Apertura di e Playoff a hibami algun aña atras ora ku Banco di Caribe a komprometé ku basketbòl firmando un akuerdo di patrosinio ku nos a prolongá danki na e éksito asina grandi di e deporte aki na Kòrsou”.

Banco di Caribe komo entidat bankario a adoptá e deporte i a mira kresementu konsistente e tempu ei; e aña aki ta despues di 4 aña ku CuBaFe ta tene un kampionato hubenil. Di parti di CuBaFe nan ta mira esaki komo un logro importante, despues di kambio den presidensia i struktura den nan organisashon nan a sá di lanta e deporte bèk, te ku djasabra último a duna inisio na e weganan di Playoff. “CuBaFe ta eksistí pa mas ku 40 aña i a konosé hopi bon tempu, pero tambe tempu di reorganisashon. Durante di tur e añanan Banco di Caribe a sigui kere nos i nos ta klá pa un bes mas nos duna tur hungadó un kampionato na nivel”, esaki di akuerdo ku  Eelco Gonet di CuBaFe.

Di akuerdo ku sr. Dito de Kort, “CuBaFe ta un organisashon ku ta nifiká hopi pa e basketbòlista i tur fanátiko di e deporte. Den pasado tabatin por ehèmpel ‘CuBaFe Youth Program’ i klínikanan spesial pa brinda tur hóben ku ta praktiká e deporte di basketbòl e oportunidat pa siña, desaroyá téknika i kompartí ku otro. Esakinan ta importante pa kontinuidat di e deporte. Nos ta spera ku CuBaFe kontinuá ku su esfuersonan pa alsa kalidat di básketbòl na Kòrsou, atraé mas partisipante aktivo na e deporte i krea lidernan i trainernan nobo pa por garantisá kontinuashon di ekiponan eksistente. Nos  ta deseá tur hungadó un tremendo temporada i hopi éksito”.

Pa djaweps dia 21 di Aprel lo firma e statutonan di CuBafe i ya pa fin di luna lo hasi entrega di unifòrm nobo i sertifikado na rèfrinan ku a kompletá nan training.