Despues di basta rumor falsu………
Despues di a risibi un komunikado ofisial di e bestuur di e organisashon WEPA! Nos por informa ku firmesa ku niun ora so no tabata e kaso ku Wepa lo no partisipa mas na karnaval di Korsou 2016.
Despues ku Wepa a reuni ku su miembronan 3 siman pasa i a informa na nan ku di parti di e organisashon tur kos ta kla pa Wepa por bai karnaval pero ku na e momento ei ni 25% di e miembronan no a paga na kontribushon a lanta un rumor falsu ku Wepa lo no partisipa mas den Karnaval 2016.
Mirando e echo ku direktiva di Wepa ta un organisashon boluntario i serio a duna di konose na tur presente ku si miembronan no paga nan kontribushon den 1 siman Wepa lo no por partisipa den karnaval. Ta un echo ku miembronan di tur gruponan di karnaval ta warda na ultimo ora pa paga nan kontribushon. Esaki ta un problema ku kasi tur grupo di karnaval na korsou tin i Wepa a disidi ku e si lo no por tuma e riesgo di hasi invershonan kuantioso i pa den december e tende di su miembronan ku nan no ta bai karnaval mas pa kwalke motibu balido ku nan por tin. Un grupo di karnaval responsabel ta será su kontraktnan ku banda, security, catering, generator, trekker, tráiler et etc for di trempan i nan mester kumpra nan telanan pa por kos e tur miembro su panja na tempu i esaki Wepa a ilustra na su miembronan ku si nan no paga nan kontribushon Direktiva lo no hasi e invershonan aki.
Hopi ta e preguntanan ku Wepa a hanja ku si nan ta partisipa den karnaval 2016 i e kontesta ku nos a risibi ta simplemente ku SI Wepa ta partisipa paso después di e reunión Wepa su miembronan a kompronde e situashon i a paga nan kontribushon manera mester ta. Pa esaki tambe Wepa ke jama su miembronan un danki spesial i ta pidi esunan ku ta malinforma pa por fabor korda ku karnaval ta algu ku ta promove Korsou i kada apoyo ku gruponan di karnaval por hanja den un forma positivo ta juda engrandese nos karnaval i alabes nos dushi Korsou. Pesei, Sintibo Bon, Sintibo Wepa!
Wepa su tema lo ta “Hesta un Bon Wepa”, Wepa lo partisipa den karnaval 2016, Wepa Band lo partisipa den Festival di Tumba 2016, Wepa lo organisa huntu ku Estreno Mas Pikete e prome Festival di Jump In HAK’E, kiermen sigur sigur Wepa ta un grupo di karnaval ku por ser konsidera un grupo sumamente grandi pa loke ta trata aporte na karnaval di Korsou.
Direktiva di Wepa,