ATIA a convence hende muhenan con pa surpasa bareranan E di 3 conferencia anual di hende muhe a kibra tur expectativa

ORANJESTAD, Aruba – 24 di augustus 2014: “Conocemento ta algo sumamente importante. No ta pornada den e propagandanan nos tabata bisa knowledge is power. Conocemento ta algo cu nunca ningun hende mas por kita for di Bo”, asina mr. Drs. Igmar Reyes, director di Aruba Trade and Industry Association (ATIA) a duna di conoce despues di e 3 edicion di “Women in Leadership Conference” cu a tuma luga diabierna ultimo den un sala completamente yen na Renaissance Convention Center. Manera anticipa, e acogida pa e conferencia aki a kibra tur expectativa, no solamente den atendencia, pero tambe den e informacionnan valioso cu a bini padilanti. E oradornan invita Francio Guadeloupe, Michelle Ryan, Anita de Groot y e orador principal Carmen Breeveld a guia nos hende muhenan con pa kibra tur barera den e mundo di negoshi y profesional aki na Aruba. E tema principal di e aña aki a concentra riba e bareranan cu hende muhe ta confronta den nan carera profesional, con por kibra e asina yama “Glass Ceiling” y amplia e horizonte pa logra tur obhetivo como un lider. E conferencianan anterior tabata mas enfoca riba con pa motiva y inspira hende muhenan. E biaha aki a sali for di e punto di bista cu e hende muhe na Aruba ta bon motiva, inspira, tin experencia y tin tur cualidad necesario pa ocupa funcionnan di liderazgo. ATIA como organisacion ta consciente di su rol, di no solamente sali na interes di su miembronan, di comercio, pero tambe pa aporta na comunidad dor di organisa e tipo di seminarionan asina den cual ta subraya conocemento di e ser femenino. “Basa riba e comentarionan cu nos a haya awe, nos por sali for di e punto di bista cu e participantenan a haya hopi informacion. E oradornan a haci uzo di varios angulo pa educa e hende muhenan riba con pa nan mes por kibra glass ceiling cu de facto no ta existi”, asina Igmar Reyes di ATIA a duna di conoce despues di e conferencia. Hopi hende muhe ta bisa cu nan ta trahando duro, ta haci tur loke ta den nan alcance, pero toch ta keda ey. Diabierna a convence nan di e bareranan cu ta existi y awor cu nan ta consciente di dje, nan a haya e hermentnan necesario con pa surpasa e barera y pa ta exitoso den nan carera. ATIA ta masha contento di por a conta cu dos patrocinado cu mesora a brasa e proyecto aki, esta Caribbean Mercantile Bank y Setar N.V. Sin nan sosten e conferencia aki lo no tabata posibel. Ta bon pa enfatisa cu henter aña ATIA ta tene diferente seminario pa su miembronan. Por ehempel otro luna International Labor Organisation (ILO) lo ta na Aruba pa riba iniciativa di ATIA nan duna dos tayer, un riba productividad laboral y otro riba “tripartite” den cual lo dialoga entre e sector di Gobierno, Sindicatonan y Gremionan comercial. Durante e seminario lo atende varios topico di interes comun pa tur e partnernan social, algo cu ta masha popular e ultimo añanan na Aruba caba. A funda Aruba Trade & Industry Association (ATIA) dia 18 di juni 1945, bou di e nomber “De vereniging van Handelaren op Aruba” y na aña 1964 a cambia e nomber pa “De Arubaanse Vereniging voor Handel en Industrie”. Meta di e asociacion ta pa sirbi e necesidadnan di su miembronan, trahando hunto cu departamentonan di Gobierno y e negoshinan pa promove calidad den e industria comercial di nos pais, pa promove un crecemento stabiel di nos economia y di e calidad di bida di nos hendenan. Desde aña 2014, Michel Henriquez ta Presidente di e asociacion cu ta creciendo den miembresia y cu e vision pa por ta un digno representante di e interes di tur nan miembronan.