WILLEMSTAD – Ayera atardi ‘Xquisit’ a habri su portanan den Renaissance Mall na unda ántes tabata CRU Steak House & Wine Bar. Un grupo selekto di invitadonan kual mayoria klientenan korporativo di Renaissance Curacao Resort i miembronan di prensa tabata presente pa risibí e promé eksperensia di e restorant. Xquisit, ta nifiká sabroso, dushi, ekstremadamente delisioso derivá for di e palabra ‘exquisite’ na franses. Ta sigur ku e restorant aki lo reflehá esei i muchu mas.  For di e siman aki Xquisit lo estrená su menú nobo i lo sigui ta habrí pa ‘lunch’ i ‘dinner’ tambe.  Xquisit lo estrená su menú ku ta brinda e oportunidat di tin reunionnan di trabou òf disfrutá di un kòpi di kòfi òf kòktel despues di trabou. Xquisit ta primintí di bira un di e restorantnan favorito den tempu kòrtiku, esaki ta debí na su esfera relahá i ‘trendy’ ku lo gara atenshon di tur ku bishit’é. Pa hasi e eksperensia total, Xquisit ta ofresé un 3 course menu amplio durante almuerso i por skohe entre 5 aperitivo, 5 plato prinsipal, 5 desserts i sena pa un preis figo i atraktivo. Komo oferta di introdukshon Xquisit lo lansa un preis di 55 florin (pa persona) pa sena te ku fin di Aprel. Ta bon pa menshoná tambe ku por skohe entre 6 aperitivo, 6 plato prinsipal, 6 desserts i un menú spesial di karni. E menú di Xquisit lo kambia kada 3 luna dunando tur bishitante oportunidat di disfrutá di un variashon kontinuo di sabor.