Kòrsou ta sigui kere den Siman di Kultura, p’esei Kas di Kultura ta brinda hinter komunidat di Kòrsou e aña aki atrobe: Siman di Kultura 2014!! E fecha di Siman di Kultura e aña aki ta di 28 di Sèptèmber te ku 5 di Òktober 2014. E grupo di enfoke pa Siman di Kultura ta pueblo di Kòrsou en general i spesialmente Bario. E liña kòrá ku lo kore den tur aktividat ta “ Pasado, Presente i Futuro”. Kas di Kultura ta hasi yamada na tur famia, bario, radio emisora, kanal di televishon, skol, empresa di gobièrnu, empresa privá, instituto, fundashon, grupo kultural i artista pa ban “Hasi grandi nos Kultura i alsa nos Nashon” i kuminsá prepará pa Siman di Kultura 2014.

Durante Siman di Kultura 2014 Kas di Kultura ta :

–          Pone atenshon dirigí riba diferente forma di manifestashon di Kultura i Kòrsou.

–          Pone atenshon na nos kultura Pasado, Presente i futuro.

–          Apoyá Bario, Famia, Organisashon i Artista pa organisá evento kultura artístiko.

–          Mobilisá hinter komunidat pa asistí na diferente evento i aktividat kultural;

–          Stimulá union familiar rondó di kultura di Kòrsou;

–          Promové konsiensia kultura;

–          Promové i Stimulá Kultura di Kòrsou;

–          Promové i Stimulá Kreatividat;

–          Promové union bou di tur suidadano;

–          Garantisá e derechi universal di tur suidadano riba kultura propio.

Nos ke rekordá tur persona, instansia, i grupo pa manda nan programa di aktividat pa Siman di Kultura 2014.  E lo sali den e programa di aktividat ku Kas di Kultura ta bai imprimí.  Di e manera aki tur hende por keda na altura di e aktividatnan ku lo bai tin durante di Siman di Kultura 2014.
Manda bo programa te ku dia 15 di Sèptèmber 2014, na simandikultura2014@gmail.com i tambe via di fax na 461-7133.
Kas di Kultura ta invitá hinter komunidat di Kòrsou pa “ Hasi Grandi nos kultura i alsa nos Nashon”.
Ban laga kultura di Kòrsou sigui brota den tur skina di 28 di Sèptèmber te ku 5 di Òktober 2014.