WILLEMSTAD- 24 di yüli 2014 –E sifranan total di kantidat di turista di estadia pa loke ta trata e promé 6 lunanan di 2014 ta mustra un bahada di 3%. Un total di 209.701 turista di estadia a bishita nos isla durante e promé 6 lunanan di aña kompará ku 216.530 e mesun periodo na 2013. E region di Europa si a sigui krese miéntras otro regionnan si a registrá un bahada. E montante generá durante e promé 6 lunanan di 2014 a keda kalkulá na 356.9mion florin. E kantidat di turista di estadia for di e region di Europa a konosé un oumento di 5% den e promé 6 lunanan di aña. Un total di 92.213 turista europeo a bishita nos isla kompará ku 87.611 e mesun periodo aña pasa. Region di Sur i Nort Amérika a konosé un bahada na e kantidat di turista den  e promé 6 lunanan di 2014. Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé 6 lunanan di 2014, sektor di turismo a generá un impakto direkto di 356.9 mion florin pa nos ekonomia lokal. Turistanan ku a bishita nos for di Europa a gasta un total di 170.0 mion florin ku ta 47.7% di e total generá den e promé 6 lunanan di aña, sigui pa turistanan for di Sur Amérika ku a gasta un total di 83.7 mion florin miéntras turistanan for di e region di Nort Amérika a gasta un total di 68.4 mion florin. E entrada generá for di Karibe den e promé 6 lunanan di e aña aki a keda kalkulá na 19.1 mion florin. E echo ku region di Europa a sigui desaroyá positivamente a trese kuné un oumentu di 3% den e kantidat total di anochi registrá den e promé 6 lunanan di aña. E kantidat total di anochi ku e turista a keda riba nos isla e promé 6 lunanan di 2014 a keda kalkulá na 1.883.687 kompará ku 1.833.184 e mesun periodo na 2013. E region di Europa tabata responsabel pa un kantidat di 1.026.366 anochi. Por bisa ku e kantidat aki ta 6% mas kompará ku e aña anterior e mesun periodo. Konsiderando ku mayoria turista ku nos ta risibí ta bini for di Europa esaki tin un influensha positivo riba e kantidat total di anochi ku e turista ta keda riba nos isla. E region di Sur Amérika a registrá un kresementu leve di 2% den kantidat di anochi. Den sifranan apsoluto ta trata di 406.755 anochi pa loke ta trata e promé 6 lunanan di aña. E kantidat aki ta 9.627 anochi mas kompará ku aña pasa. Pa loke ta trata Nort Amérika i Karibe si e kantidat di anochi registrá tabata ménos. E kantidat di turistanan for di e 5 merkadonan prinsipal pa Kòrsou pa loke ta trata e promé 6 lunanan di 2014 tabata; Hulanda ku 69.766, Venezuela ku 35.601 Estádos Unídos ku 27.182, Alemania ku 9.128 i Aruba ku un total di 8.223.

Yüni 2014

E sifranan preliminar kolekta dor di CTB for di e tarhetanan di imigrashon ta mustra ku na yüni 2014 un total di 33.095 turista di estadia a bishita Kòrsou. E kantidat di turista di estadia aki ta resultá di ta igual (0%) ku e kantidat di turista di estadia registrá aña pasa den mesun luna. E kantidat di turista for di Sur Amérika a oumentá ku 18%. For di Venezuela por nota un oumento di 37% na  luna di yüni. Un total di 8.082 Venezolano a keda registrá na yüni 2014. For di Europa a keda registrá 1% mas turista di estadia. Nort Amérika i e region di Karibe a registrá un bahada di 24%. Pa lokual ta trata kantidat di anochi registrá den e luna di yüni, CTB por menshoná ku esaki a keda registrá na 6% mas ku aña pasa. Un total di 291.490 anochi a keda registrá. Na yüni 2013 esaki tabata ménos, esta 276.187 anochi.