Willemstad, Zaerick Martha ta ganadó di Luna Yen 2014. Tur aña di nobo e ganadó di Luna Yen ta haña invitashon di parti di e organisashon Kunstbende pa ta invitado speshal den nan final. Zaerick a biaha pa Hulanda dia 16 di sèptèmber último pa asina representá Kòrsou den e Final di Kunstbende. E presentashon tabata djasabra 26 di sèptèmber na Westergasfabriek, Amsterdam. E la presentá su poesia titulá “I See” e poesia ku e la gana Luna Yen kuné pero e biaha aki e la hasié na Ingles. Sala tabata kompletamente ketu ora ku Zaerick a subi esenario komo un hende siegu kompañá pa Jennifer Muntslag, e mc den e area di Poesia i Teater. Durante di e poesia e públiko tabata ketu i atento na kada palabra ku Zaerick tabata bisa. E ganadónan di Gang di Arte, Aruba tambe a presentá den e mes un sala “ Westergastheater” ku Zaerick. Un total di 250 hende por a disfrutá di e mucha hòmber aki su talento. Na final di e presentashon hopi hende a kere ku e tabata siegu di bèrdat. E la haña bon remarke pa loke tabata su presentashon na Kusntbende. Aparte di esei, promé ku e la bai Kunstbende e la haña otro invitashon serka Gershwin Bonevacia. Gershwin tabata lastu na Kòrsou pa un presentashon. Despues ku e la bai bek Hulanda e mes tabatin su presentashon “I speak” na Bijlmer Parktheater. Riba e dia aki e públiko por a gosa un biaha mas di Zaerick. Luna Yen, Banco di Caribe, Refineria Isla, Teatro Luna Blou i La Tentashon ke yama Zaerick Martha masha pabien ku e tremendo presentashonnan ku ba duna na Hulanda i pone nòmber di Kòrsou haltu.