Siman ku a pasa a tuma lugá riba un inisiativa salí for di un koperashon entre University of Curaçao Dr. Moises da Costa Gomez (UoC), Hogeschool van Arnhem en Nijmegen (HAN) i Skol Salú ku ta kai bou di DOS, presentashon di e resultadonan di un investigashon partisipativo bou di dosentenan di grupo dos tokante “skibimentu preparatorio” na Dienst Openbaar Schoolbestuur (DOS). E meta di e investigashon tabata pa inventarisá e nesesidat pa sosten ergoterapeútiko riba tereno di skibimentu preparatorio bou di dosentenan di grupo dos. Despues riba petishon di e tim di kuido di DOS a traha un map di trabou ku ehersisionan i material pertenesiente. E aktual proyekto di investigashon ta un kontinuashon di e investigashon ku aña pasá a keda hasí bou di alumnonan di grupo dos, pa haña sa te ki grado nan tabata dominá e abilidatnan motóriko fini. E proyekto di investigashon a keda hasí dor di tres studiante di ergotherapíe di HAN: Sabine Elsjan, Lieke Pross i Carlijn van Uum. Di parti DOS Floor Wieringen MSc a fungi komo dosente práktiko i di UoC dr. Odette van Brummen-Girigori a fungi komo guia pa e método di investigashon.