WILLEMSTAD – 13 di yüli 2026 –Ofisina di Turismo di Kòrsou (CTB) ta raportá ku turismo di estadia a kontinuá su trayektoria di prestashon positivo na yüni 2026, kontribuyendo na e promé mitar di mas fuerte den historia pa Kòrsou. Entre yanüari i yüni, Kòrsou a yama bon biní na 437.086 turista di estadia representando 9% kresementu kompará ku 399.967 turista registrá e mesun periodo na 2025. Esaki ta marka e promé biaha den historia ku Kòrsou a risibí mas di 400 mil turista di estadia den e promé 6 lunanan di aña.
Prestashon yüni
Durante yüni 2026, Kòrsou a registrá 62.867 turista di estadia, representando un oumento di 9% kompará ku e kantidat di 57.413 turista risibí na yüni 2025. E turistanan aki a generá 497.426 anochi, un oumento di 12% kompará ku e mesun luna na aña pasá. E promedio di estadia tabata 7.9 anochi, 3% kresementu kompará ku yüni 2025. Den término di preferensia di akomodashon, 54% di turistanan di estadia a skohe pa resort hotels miéntras 46% a opta pa otro opshon di akomodashon.
Prestashon tòp 3 merkadonan na luna di yüni 2026
Hulanda ta sigui ta Kòrsou su merkado prinsipal na luna di yüni, ku un total di 20.029 turista di estadia, reflehando un kresementu di 22% kompará ku yüni 2025. Turistanan hulandes a keda un promedio di 12.1 anochi durante nan bishita. Di e turistanan aki, 44% a skohe resort hotel miéntras 56% a skohe un otro opshon di akomodashon.
Estádos Unídos ta e di dos merkado mas grandi pa Kòrsou na luna di yüni, ku 16.070 turista di estadia, reflehando 6% bahada kompará ku yüni 2025. E bahada tabata prinsipalmente relashoná ku e patronchi di biahe durante e periodo di Kopa Mundial di FIFA. E partisipashon di Kòrsou na e torneo a oumentá e kantidat di residente ku a biaha bai afó, pa e motibu aki parti di e kapasidat di stulnan riba avion a keda usá pa lokalnan ku a biaha pa asistí na e torneo. Esaki temporalmente a redusí e volúmen di bishitantenan ku a biaha for di Merka pa bishitá Kòrsou. Turistanan prosedente di Estádos Unídos a keda un promedio di 5.9 anochi. Di e turistanan aki 66% a skohe pa resort hotels miéntras 34% a opta pa otro opshon di akomodashon.
Colombia ta sigui demostrá kresementu fuerte komo e di tres merkado mas grandi, registrando 7.144 turista di estadia, un kresementu di 24% kompará ku yüni 2025. Bishitantenan di Colombia a keda un averahe di 5.3 anochi. Resort hotels a kedae eskoho di akomodashon preferí pa turistanan kolombiano (58%) miéntras 42% a opta pa otro opshon di akomodashon.
Prestashon promé mitar di aña E resultado fuerte di luna di yüni a reforsá e prestashon di e promé mitar di aña. Di yanüari pa yüni 2026, Kòrsou a risibí 437.086 turista di estadia, 9% kresementu kompará ku 2025. Hulanda a keda e merkado mas grandi ku 134.613 turista di estadia kual ta 31% di tur turista ku a bishitá nos pais, siguí pa Estádos Unídos ku 116.952 turista (27%). Canada a kontribuí ku 31.386 turista (7%), miéntras Colombia a registrá 28.817 turista representando 7% di e total di turistanan risibí. Ademas, Brazil i Argentina tambe a kontribuí na e kresementu di e promé mitar di aña ku respektivamente 20.488 (5%) i 19.062 (4%) turista di estadia. Huntu, e resultadonan aki ta mustra un demanda kontinuo for di e merkadonan prinsipal i un fundeshi sólido pa sobrá di 2026.
About the Author
