Willemstad, 28 di Juni 2022
Despues di ekstenso deliberashon i a base di sugerensia di departamento Meteorológiko di Kòrsou I tambe Tim di Krisis i Kalamidat di Kòrsou organishon di Hak’e Curaçao Summer Festival mester pospone e festival pa fechanan nobo ku ta 5 i 6 di Augustus 2022.
E motibu prinsipal pa nos ta seguridat di hende. Segun tur modelonan konfirmá pa Meteo (segun rueda di prensa di Gobièrnu di Kòrsou) e Sistema Invest 94L lo pasa hopi serka di nos isla den e dianan aki resultando ku entre djarason i djaweps lo tin hopi awaseru huntu ku bientunan fuerte entre 60 pa 75 kilometer pa ora. E situashon aki ta un situashon hopi serio kaminda nos tur mester tuma prekoushon. No solamente pa Hak’e Curaçao Summer Festival pero kada famia aki na Kòrsou.
Pa motibu di e situashon di tempu aki nos komo un organisashon responsabel simplemente no por sigui ku e preparashonnan manera mester ta. Al kontrario pa evita kwalke kalamidat nos mester a desmantela tur banner den e konstrukshonan di ensenarionan. Nos mester a tuma pasonan di seguridat na e tereno di e Festival en espera di Sistema ku ta desaroyando segun tur modelonan den un posibel tormenta tropikal (Fuente: Meteo Kòrsou i Hurricane center). Fuera di esaki nos partner di produkshon di zonido i lus (Massive) no por tuma e riesgo di instalá ningun ekipo sabiendo e mal tempu ku ta na kaminda. Esakinan tur ta loke nos ta konsidera komo un situashon “Force Majeure”.
Pa por amplia riba nos desishon; E organisahon di Hak’e ta para pa kalidat i servisio. Pa ku esaki nos ta hiba lunanan di preparashon. Pa e promé edishon di Hak’e Curaçao Summer Festival nos tin mas ku 7 luna ta prepara ku invershonan kuantioso. E ta imposibel pa nos por kumpli ku tur e espektativa nan si nos no por kontinua ku e trabounan di preparashon den e dianan aki pa motibu di un mal tempu. Pa hasi esaki despues ku e posibel peliger di mal tempu pasa ku ta djaweps merdia segun informashon risibí, simplemente esaki ta imposibel. Abo ku a kumpra bo karchi mester haña e servisio den su totalidat pa abo por pasa un anochi inolvidabel. Esaki pa motibu di e desaroyo di mal tempu no ta nos alkanse.
Nos a delibera ku tur artista riba nos Line Up di tantu djabierne 1 di yüli i djasabra 2 di yüli i nos a haña nan kompleto komprenshon i kolaborashon. Huntu nos a disidi pa nos pospone e festival pa 5 i 6 di augustus próksimo. Ku eksepshon di nos artista lokal/internashonal Ephrem J nos line up pa tur dos dos dia lo keda praktikamente meskos. Ehprem J debi na su kompromisonan di presentashonan internashonal no ta Kòrsou e fechanan menshona. Nos sigur ta lamentá esaki pero mesora ta desea Ephrem J i su team tur klase di eksito durante su presentashon nan.
Abo ku tin bo karchi di Hake’ Curaçao Summer Festival ta sigura di presensia un festival na nivel internashonal ku tur nos artistanan durante dos dia riba 5 i 6 di Augustus próksimo. Warda bo karchi bon paso bo karchi di 1 di yüli lo ta bo entrada pa dia 5 di Augustus i bo karchi di 2 di yüli lo ta bo entrada dia 6 di augustus 2022. Fechanan di entrega di pèchi ku tabata plania pa dia 30 di yüni i dia 1 i 2 di yüli lo bira 4, 5 i 6 di Augustus 2022.
Seguridat di hende na promé lugá, servisio i kalidat na kada bishitante na di dos luga i por último garantia di un evento bon organisá. Esaki nan loke Hak’e Curaçao Summer Festival ta para pe.
Sigi bo medio di komunikashon preferí pa bo keda na altura di tur desaroyo di Hak’e Curacao Summer Festival 2022.
About the Author
