….CTB i Coridja Stars Productions ta sumamente orguyoso;…
WILLEMSTAD- 7 di novèmber 2013 – Ya no ta falta hopi pa nos presensiá e gran final di e sertámen di 2013 Miss Universe ku lo bai tuma lugá djasabra awor 9 di Novèmber na Moscow, Russia . Den transkurso di simannan tras di lomba 2013 Miss Universe Curaçao, Eline De Pool a sá di skor haltu den diferente presentashon preliminar. Pueblo di Kòrsou a keda altamente impreshoná pa e trahe nashonal ku Srta. De Pool a presentá durante e presentashon di trahe nashonal den e sertámen di 2013 Miss Universe. E trahe aki a representá un Gecko (pega-pega) kolorido kual a wòrdu kompañá ku un hand piece ku e nòmber di Kòrsou riba dje. E trahe nashonal sigur tabata sentro di atenshon pa tantu medionan internashonal i lokal aya na Rusia. Ademas di esaki tabata durante e sertámen preliminar ku a tuma lugá djamars último ku Srta. De Pool a destaká ku otro presentashon fenomenal ku a sòru pa un saludo kordial di parti e maestro di seremonia Sr. Nick Teplitz pa e komunidat di Kòrsou. Ta bon pa menshoná ku esnan ku ta deseá di vota pa Srta. De Pool por sigui hasi esaki te dia 8 di Novèmber 7:00pm via; http://www.missuniverse.com/. E ganador di e internet voting lo forma parti di e semi finalistanan den e sertámen final. Mester rekordá un i tur ku e sertámen final lo tuma lugá djasabra awor 9 di Novèmber i lo kuminsá 9:00pm ora di Rusia kual ta 1:00pm aki na Kòrsou. Por konta ku transmishon di e sertámen atraves di diferente kanal di televishon entre otro; Venevision ku lo transmití e sertámen aki for di 1:00pm i NBC 10:00pm. 
Palabra no ta sufisiente pa CTB i Coridja Stars Productions ekspresá kon orguyoso ámbos organisashon ta ku e bon trabou di tantu Srta. Eline De Pool komo e delegashon di Kòrsou ku ta presente na Rusia. Ta un trabou inkansabel pa tur dia di nobo duna lo máksimo pa representá bo pais dignamente i pa e motibunan aki ta ekstendé palabranan di éksito i pabien for di aworakí na nos 2013 Miss Universe Curaçao Srta. Eline De Pool. Invitashon ta bai na pueblo di Kòrsou pa sintonisá e sertámen di 2013 Miss Universe ku lo tuma lugá na Crocus City Hall na Moscow, Russia djasabra awó 9 di Novèmber, 2013 próksimo i kòrda ‘like’ e página ofisial di Miss Universe Curaçao; https://www.facebook.com/missuniversecuracao.
About the Author
