ATA ta logra surpasa cifranan cu tabata premira pa presupuesto di 2015
Minister Otmar Oduber diamars mainta na momento di sali for di reunion cu hunta di supervision di ATA SG, a topa cu prensa pa comparti algun detaye di rapport financiero di oficina di turismo. ATA su cuenta anual ta keda cla den transcurso di otro siman pero Minister ya caba a comparti cu for di e cifranan den e rapport financiero di ATA por menciona cu a logra surpasa cifranan cu tabata premira pa presupuesto di 2015. Ta trata aki di un suma di 17.1 miyon florin cu a genera durante aña 2015. E mandatario ta splica cu den e cambio di ley cu a haci december ultimo pa locual ta trata e fondo di reserva di ATA, ta stipula cu mester tin un suma minimo y/of un suma maximo cu awor lo keda stipula for di e 17.1 miyon florin pa cu e contribucion cu mester tuma luga den e presupuesto di pais Aruba pa 2016. E ley anteriormente tabata papia solamente di un suma maximo cu a bira minimo un cuart di e presupuesto di mercadeo cu a logra cumpli cu ne aña pasa. Cu e cambio di ley awor ta pone cu e suma maximo por wordo hisa. Den e dianan nos dilanti e management team como tambe e hunta di supervision di ATA lo bay fiha exactamente cuanto di e 17.1 miyon florin, ta bay poco poco pa yega e cantidad maximo di locual ta trata e fondo di reserva di ATA conforme e ley.Minister Oduber ta gradici y felicita henter e ekipo di ATA y e CEO pa un otro aña excepcional cu e ta categorisa como un di e miho añanan pa locual ta trata financieramente. Un maneho cu a keda reconoci tambe den e rapport final di C.A.D.E mandatario ta satisfecho mirando cu ta presenta cifranan positivo, unda ta sali for di un epoca unda 5 aña pasa oficina di turismo di gobierno tabata costa gobierno placa banda di e “room tax” cu tabata wordo cobra. “E tempo ey 27 miyon tabata wordo cobra for di “room tax” y e gastonan di ATA su operacion tabata rond di 57 miyon, kiermen tur aña Gobierno mester a contribui cu 30 miyon te cu 5 aña pasa. Awor nos tin un situacion cu Gobierno no ta contribui cu niun fondo, alcontrario. Ta scapa e 30 miyon y adicional por menciona tambe cu e empleadonan nan salarionan como cu nan no ta empleadonan publico mas. Y riba dje ta genera cifranan manera nos ta presenta awe di 17.1 miyon.” Minister Oduber ta sigui splica cu adicional ATA ya caba a contribui na e fondo di reserva stipula na ley cu e suma minimo cu ta 18.7 miyon y awo lo dicidi for di e 17.1 miyon cuanto lo destina pa logra poco poco yega na e suma maximo stipula pa ley den e fondo di emergencia aki.Tin un presupuesto cu ta wordo traha tur aña y cu ta wordo aproba pa hunta di supervision di ATA, Minister di Turismo y tambe Parlamento. Den e planificacion aki ta hinca strategianan cu lo kier impone pa e aña ey. E resultado financiero aki ta mustra cu tur e strategianan a keda eherce durante e aña pero adicional a logra un entrada adicional cu ta bay den caha di Gobierno. Sigur resultadonan positivo pa locual ta trata e cifranan financiero di aña 2015.
About the Author
