WILLEMSTAD – Djaluna atardi Antilliaanse Verf Fabriek a tene un enkuentro ku prensa i representantenan di diferente kompania ku ta bende fèrf di AVF Paints pa duna un presentashon di un aplikashon (App’) inovativo ku e kompania lokal a bin ta traha riba dje pa kasi un aña. A duna informashon di e diferente opshonnan ku e ‘app’ ta brinda na esnan presente. Bahando e ‘app’ riba bo ‘smart phone’ o tablet kada persona, pareha, òf grupo di persona por purba diferente posibilidat pa duna koló na diferente partinan di un kas partikular o edifisio komersial. Banda di ku bo por hasi prueba ku riba bo pantaya ku diferente koló o kombinashon di koló di fèrf di AVF Paints, e ‘app’ ta brinda otro posibilidatnan manera kálkulo di e kantidat di fèrf ku bo mester i tambe otro opshon. Esnan presente na ouditorio di BNK a baha e ‘app’ mes ora riba nan telefon i a kuminsá hasi ehersisionan di prueba. Tur a keda enkantá ku e fasilidatnan di e ‘app’.
Na final di presentashon di e ‘app’, direktor di AVF Paints, sr. Horace Hinds a lansá di un forma ofisial e jingle nobo di e kompania i e visual ku ta kompañá esaki. Kreashon i produkshon di e jingle i e video tabata na enkargo di e artista lokal sr. Farley Lourens.
Mas aleu direktor di e prestigioso empresa a anunsiá ku na kaminda pa selebrá 55 aña di Antilliaanse Verf Fabriek e kompania lo hasi diferente proyekto. Entre nan proyektonan den kuadro di responsabilidat korporativo sosial ku e kompania komo un gesto di duna bèk na e komunidatnan ku kua ta hasi negoshi. Un di nan ta un proyekto ku lo ehekutá huntu ku Biblioteka Nashonal Kòrsou, Frank Martinus Arion, den kua komunidat kompletu ta envolví. Mas den transkurso di aña lo anunsiá detaye di e proyekto aki.
Na final di e presentashon sr. Hinds a rekomendá pa keda persona baha e ‘app’ i purba kada opshon ku e aplikashon ta brinda. “E ta unu hopi fásil pa un persona por traha kuné i lo bo keda fasiná di e opshonnan ku e ‘app’ ta brinda,” Hinds a finalisá bisando.
About the Author
